Një nga themeluesit dhe komandantët e Ushtrisë Çlirimtare Kombëtare, Ali Ahmeti, ka folur për procesin gjyqësor ndaj ish-krerëve të Ushtrisë Çlirimtare të Kosovës në Hagë.
Duke folur në emisionin “Debat Plus”, Ahmeti ka mohuar se në fshatin Kollare të Kërçovës ka pasur përplasje mes ish-presidentit të Kosovës, Hashim Thaçi, dhe Beadin Allaqit.
“Në Kollare nuk ka pasur asnjë përplasje në mes Hashim Thaçit dhe Beadin Allaqit. Pjesëmarrja e Hashim Thaçit në Kollare, ai ka qenë njëri nga pjesëmarrësit më të rinj në atë takim dhe nuk ka pasur fare debat midis Thaçit dhe Allaqit. Beadin Allaqi ka qenë në krye të Lëvizjes Popullore të Kosovës. Për çudi, tani po e bëjnë atë legjendë”, ka deklaruar Ahmeti.
Ahmeti ka folur edhe për dëshminë e tij pranë Prokurorisë së Specializuar, duke thënë se kishte kërkuar që deklarata të publikohej, pasi është person publik dhe dëshmia e tij, sipas tij, është dhënë para dy prokurorëve.
“Unë kam bërë deklaratën time pranë Prokurorisë Speciale. Kam kërkuar atëherë që dëshmia ime të publikohet, sepse jam person publik dhe e tërë kjo situatë është e deklaruar përpara dy prokurorëve të Prokurorisë Speciale”, ka thënë ai.
Sipas Ahmetit, atij i është premtuar se deklarata e tij do të publikohet pas përfundimit të hetimeve.
“Kam marrë premtimin që deklarata ime, do të publikohet pasi të dalë epilogu i hetimit”, ka deklaruar Ahmeti./Telegrafi/
