Biotina, një vitaminë e tretshme në ujë e grupit B, luan rol në prodhimin e keratinës, proteinës kryesore që përbën flokët, lëkurën dhe thonjtë.
Për këtë arsye, ajo gjendet shpesh në suplemente, shampo dhe produkte që premtojnë flokë më të dendur dhe më të fortë.
Megjithatë, sipas të dhënave të përmbledhura nga Healthline, nuk ka prova të forta se suplementet me biotinë nxisin rritjen e flokëve te personat që nuk kanë mungesë të kësaj vitamine.
Mungesa e biotinës është e rrallë te njerëzit e shëndetshëm që ushqehen në mënyrë të balancuar, por kur shfaqet mund të shkaktojë hollim ose rënie të flokëve, thonj të brishtë dhe probleme të lëkurës.
Rënia e flokëve mund të lidhet edhe me shumë faktorë të tjerë, përfshirë mungesën e hekurit, zinkut ose proteinave, humbjen e shpejtë në peshë, çrregullimet hormonale dhe faktorët gjenetikë.
Për këtë arsye, marrja e biotinës pa përcaktuar shkakun e rënies së flokëve mund të mos japë rezultat dhe mund të vonojë trajtimin e duhur.
Nevoja e përshtatshme ditore për biotinë është rreth 30 mikrogramë për të rriturit dhe 35 mikrogramë për gratë që ushqejnë me gji.
Ajo gjendet në ushqime si vezët e gatuara, mëlçia e viçit, salmoni, mishi, farat e lulediellit, patatet e ëmbla dhe bajamet.
Mungesa mund të jetë më e mundshme te personat me kequshqyerje, përdorim kronik të alkoolit, sëmundje inflamatore të zorrëve, disa çrregullime gjenetike, gjatë shtatzënisë ose ushqyerjes me gji dhe te personat që përdorin disa lloje ilaçesh.
Edhe pse suplementet me biotinë përgjithësisht konsiderohen të sigurta, doza të larta mund të ndërhyjnë në disa analiza laboratorike, përfshirë testet e hormoneve të tiroides, vitaminës D dhe disa treguesve të shëndetit të zemrës.
Prandaj, personat që marrin suplemente me biotinë duhet ta informojnë mjekun para kryerjes së analizave të gjakut. /Telegrafi/
