Përzgjedhësi i Kombëtares së Gjermanisë, Jurgen Klopp, ka dalë në mbrojtje të Florian Wirtz, duke kërkuar një qasje më objektive në vlerësimin e paraqitjeve të mesfushorit ofensiv me përfaqësuesen.
Klopp theksoi se pritshmëritë e larta ndaj Wirtz janë të tepruara dhe se lojtari duhet të ndihet i lirë për të dhënë kontributin e tij në funksion të ekipit, pa pasur gjithmonë presionin për të prodhuar momente vendimtare.
“Biseda me Wirtz është shumë e këndshme, por duhet të largohemi nga pritshmëria që ai duhet të na dhurojë momente të veçanta në çdo ndeshje. Ai është këtu për të na ndihmuar si ekip. Duhet të sigurohemi që Flo të ndihet mirë me ne”, deklaroi Klopp.
Përzgjedhësi gjerman është veçanërisht kritik ndaj diskutimeve që zhvillohen pas ndeshjeve, kur Wirtz nuk shënon apo nuk asiston.
“Duhet të jeni të kënaqur kur Florian Wirtz luan një ndeshje në të cilën jep gjithçka, edhe nëse nuk është i përfshirë në një gol. Thjesht duhet t’i japim djalit ndjesinë: ‘Sot ishte më shumë se mirë’”, u shpreh ai.
Klopp më pas kritikoi ekspertët dhe opinionin publik për analizat që vënë në dyshim paraqitjet e Wirtz sa herë që ai nuk regjistron statistika në aspektin ofensiv.
“Pastaj të gjithë ekspertët ulen dhe diskutojnë se pse ende nuk ka funksionuar. Por ka po aq arsye për të thënë: ai po funksionon në mënyrë perfekte. Tani le t’i bëjmë së bashku hapat e ardhshëm”, shtoi Klopp.
Me këto deklarata, Klopp synon të ulë presionin mbi Wirtz dhe të theksojë se kontributi i një lojtari nuk duhet të matet vetëm përmes golave dhe asistimeve.
Për përzgjedhësin gjerman, para së gjithash rëndësi ka paraqitja e lojtarit dhe kontributi i tij në suksesin e ekipit. /Telegrafi/
