Një burrë sirian ka përjetuar një moment të veçantë pasi u kthye në shtëpinë e tij në Damask dhe gjeti të paprekur bibliotekën private që e kishte fshehur brenda një muri 15 vjet më parë.
Para se të largohej nga Siria drejt Kuvajtit, ai kishte vendosur librat në një hapësirë të fshehtë brenda murit, për t’i mbrojtur nga regjimi i Bashar al-Assadit, i cili kishte ndaluar një numër të madh veprash dhe botimesh.
Për 15 vjet, librat mbetën të mbyllur pas murit, ndërsa ai jetoi larg vendit të tij. Pas kthimit në Damask, vendosi të kontrollonte hapësirën ku kishte fshehur bibliotekën, raporton ntv.
Kur hapi murin, ai zbuloi se librat ishin ende aty dhe në gjendje të mirë, pikërisht ashtu siç i kishte lënë shumë vite më parë.
Pamja e bibliotekës së ruajtur i shkaktoi një gëzim të madh, pasi pas kaq shumë vitesh ai mundi t’i shihte sërish librat që kishte ruajtur me kujdes.
Rasti është shpërndarë në rrjetet sociale si një dëshmi e lidhjes së fortë të njerëzve me librat dhe kulturën, edhe në rrethana kur ruajtja e tyre mund të përbënte rrezik. /Telegrafi/
