Moska dhe rajoni përreth saj janë përfshirë nga një sulm i madh me dronë gjatë natës, ndërsa raportohet për zjarre në disa pika strategjike, përfshirë një park të madh logjistik dhe rafinerinë e naftës në Kapotnya.
Kryebashkiaku i Moskës, Sergei Sobyanin, deklaroi se mbrojtja ajrore ruse kishte zmbrapsur sulmin ndaj dronëve që po fluturonin drejt kryeqytetit. Sipas tij, shërbimet emergjente u dërguan në zonat ku ranë mbetje të mjeteve ajrore.
Më vonë, Sobyanin pretendoi se mbrojtja ajrore ruse kishte shkatërruar gjithsej 151 dronë, transmeton Telegrafi.
Ndërkohë, kanale monitorimi në Telegram raportuan se dronët kishin depërtuar thellë në territorin rus, duke lëvizur në grupe në drejtim të Moskës.
Sipas këtyre raportimeve, një goditje mund të ketë ndodhur pranë parkut teknologjik dhe logjistik Sofyino, jashtë Moskës, ku u raportua për një zjarr.
Pamje të publikuara në rrjetet sociale treguan gjithashtu një zjarr të madh në Kapotnya, zonë ku ndodhet rafineria e naftës e Moskës.
Deri në këtë fazë, nuk ka konfirmim të pavarur për shkallën e dëmeve apo për objektet që mund të jenë goditur. /Telegrafi/
