Bashkimi Evropian po përgatitet t’i ofrojë Ukrainës mbështetjen “më të fuqishme ndonjëherë” gjatë dimrit të ardhshëm, për të cilin presidentja e Komisionit Evropian, Ursula von der Leyen, paralajmëroi se mund të jetë më i vështiri që nga fillimi i luftës.
Von der Leyen tha se mbështetja e BE-së do të përqendrohet në dy fusha kryesore: forcimin e furnizimit me energji dhe ngrohje, si dhe rritjen e kapaciteteve të mbrojtjes ajrore të Ukrainës.
“Bashkë me partnerët tanë, do të ofrojmë ndihmë humanitare dhe do të forcojmë furnizimet e Ukrainës me energji elektrike dhe ngrohje”, deklaroi ajo.
Sipas von der Leyen, një tjetër shtyllë kryesore e mbështetjes do të jetë mbrojtja ajrore, veçanërisht përballimi i sulmeve ndaj infrastrukturës dhe qyteteve ukrainase.
Ajo theksoi se raketat interceptuese amerikane Patriot nevojiten urgjentisht nga Ukraina, por paralajmëroi se Evropa duhet të punojë për të ulur varësinë nga një furnizues i vetëm.
“Ne duhet gjithashtu të reduktojmë së bashku varësinë tonë nga një furnizues i vetëm”, tha presidentja e Komisionit Evropian, transmeton Telegrafi.
Von der Leyen tha se kjo mund të arrihet përmes zhvillimit, së bashku me Ukrainën, të një sistemi raketor të mbrojtjes ajrore që të jetë i përballueshëm, modular dhe më i pavarur.
Në qendër të kësaj nisme, sipas saj, do të jetë projekti ukrainas Freyja, i cili synon të kontribuojë në zhvillimin e kapaciteteve të reja të mbrojtjes ajrore.
Qasja e propozuar nga Brukseli synon të kombinojë nevojën urgjente të Ukrainës për sisteme dhe interceptorë, me përpjekjen afatgjatë të Evropës për të ndërtuar kapacitete më të qëndrueshme të mbrojtjes dhe për të reduktuar varësinë nga një burim i vetëm furnizimi.
Dimri i ardhshëm pritet të jetë veçanërisht sfidues për Ukrainën, ndërsa furnizimi me energji, ngrohja dhe mbrojtja e infrastrukturës kritike mbeten ndër shqetësimet kryesore. /Telegrafi/
