Gjykata në Paris i dha Kim Kardashian një euro dëmshpërblim për grabitjen e armatosur në vitin 2016 në kryeqytetin francez, dhe kjo është shuma që ajo vetë kërkoi.
Vendimi u mor të martën dhe, sipas avokatit të përfshirë në çështje, i njëjti kompensim prej një euro iu dha stilistes Simone Bretter, e cila ishte e pranishme gjatë grabitjes.
Kardashian ishte shënjestra e një sulmi më 2 tetor 2016, gjatë Javës së Modës në Paris, ndërsa po qëndronte në Hotel de Pourtales.
Dy grabitës, të maskuar si oficerë policie, hynë me forcë në apartamentin e saj, e lidhën me lidhëse plastike dhe shirit ngjitës dhe vodhën bizhuteri me vlerë më shumë se gjashtë milionë dollarë, përfshirë unazën me diamant që ajo mbajti në shfaqjen e Givenchy atë mbrëmje.
Vitin e kaluar, një gjykatë shpalli fajtorë tetë persona për rolin e tyre në një grabitje që ylli amerikan e përshkroi si përvojën më të tmerrshme të jetës së saj.
Për shkak të moshës së tyre të shtyrë, të pandehurit u bënë të njohur në Francë si “banditët gjyshër” dhe të gjashtë ishin midis 60 dhe 70 vjeç në kohën e gjyqit.
Ata u akuzuan për grabitje të armatosur, rrëmbim personi, anëtarësim në një grup kriminal dhe krime të tjera. Meqenëse koha e kaluar në paraburgim para gjyqit u përfshi në dënimin e tyre, asnjë nga të dënuarit nuk u kthye në burg dhe askush nuk paraqiti ankesë.
Gjykata i dha ish-recepsionistit të hotelit 109,516 euro, megjithëse ai kërkoi 550,000 euro dëmshpërblim dhe interesa, duke pretenduar se ishte traumatizuar nga grabitja. Hotelit iu dhanë 50,000 euro.
“Jam thellësisht mirënjohëse ndaj autoriteteve franceze që sollën drejtësi në këtë rast. Ndërsa nuk do ta harroj kurrë atë që ndodhi, besoj në fuqinë e përparimit personal dhe përgjegjësisë dhe lutem për shërim për të gjithë”, tha Kim Kardashian pas vendimit.
