Shkaktoi një skandal dhe një aksident, Maldini publikon rezultatet e një testi droge pas akuzave

Futbollisti i Cagliarit, Daniel Maldini, është përfshirë në një incident të rëndë jashtë fushës, pasi gjatë fundjavës shkaktoi një aksident automobilistik në Milano, duke drejtuar automjetin nën ndikimin e alkoolit.

Pas incidentit, në rrjetet sociale nisën të qarkullonin edhe pretendime se 24-vjeçari kishte rezultuar pozitiv në një test paraprak për përdorim të substancave narkotike.

Megjithatë, Maldini ka reaguar publikisht ndaj këtyre akuzave, duke publikuar në Instagram rezultatin e një testi laboratorik për të hedhur poshtë pretendimet për përdorim droge.

Ngjarja ndodhi vetëm disa orë pasi sulmuesi i Cagliarit ishte bërë protagonist në fushë, duke shënuar golin e fitores në triumfin 2-1 ndaj ish-klubit të tij, Atalantas.

Lexo edhe nga Sport

“Mund të kishim fituar 5-0”, Jose Mourinho komenton triumfin ndaj Interit Trajneri Jose Mourinho thotë se Real Madridi e ka fituar nën kushte të vështira duke deklaruar se mund...

Më pas, mbrëmja mori një tjetër rrjedhë. Maldini, duke drejtuar një Porsche Carrera 4, hyri në rrugën Via Caracciolo pa respektuar të drejtën e përparësisë dhe u përplas me një Volkswagen Golf. Përplasja bëri që Golfi të godiste edhe një Mercedes të parkuar.

Në aksident u përfshinë gjithsej gjashtë persona.

Testi i alkoolit konfirmoi se Maldini ishte duke drejtuar automjetin nën ndikimin e konsiderueshëm të alkoolit.

Testi i parë tregoi 0.91 mg/l, ndërsa i dyti 0.89 mg/l. Për këtë arsye, patentë-shoferi i tij u konfiskua në vendngjarje.

Situata u bë edhe më e bujshme pasi disa media dhe profile në rrjetet sociale raportuan se, përveç alkoolit, Maldini dyshohej se kishte rezultuar pozitiv edhe në një test paraprak për substanca narkotike.

Për t’u përgjigjur këtyre pretendimeve, futbollisti publikoi në Instagram një dokument laboratorik të lëshuar në emrin e tij, me datë 14 shtator 2026.

Sipas rezultateve të publikuara, testi rezultoi negativ për të gjitha substancat e kontrolluara.

Në këtë mënyrë, Maldini ka mohuar akuzat për përdorim të narkotikëve, ndërsa mbetet përgjegjës për drejtimin e automjetit nën ndikimin e alkoolit dhe për aksidentin e shkaktuar.

Tani pritet të shihet se cilat do të jenë masat ligjore ndaj tij dhe si do të reagojë Cagliari për incidentin e fundit jashtë fushës. /Telegrafi/