Presidenti ukrainas Volodymyr Zelensky i ka bërë thirrje Evropës të forcojë presionin ndaj Rusisë përmes sanksioneve, pasi Bashkimi Evropian dështoi të arrijë marrëveshje për rinovimin e masave ndëshkuese ndaj Moskës.
Zelensky tha se “nuk është koha që Evropa të harrojë se çfarë po ndodh” në Ukrainë, në një reagim që duket se i referohet drejtpërdrejt vonesës së BE-së për vazhdimin e sanksioneve kundër Rusisë.
Në një postim në platformën X, presidenti ukrainas tha se “të gjithë e kuptojnë” rëndësinë e sanksioneve ndaj Moskës dhe paralajmëroi Evropën që të mos i japë Rusisë atë që ai e cilësoi si “dhurata”.
“Ne kemi nevojë për sanksione të reja dhe më të fuqishme – sanksione ndaj të cilave Rusia nuk mund të përshtatet”, shkroi Zelensky.
Ai kërkoi veçanërisht masa kundër industrisë ruse të raketave balistike, përfshirë sanksione që synojnë të gjithë zinxhirin e prodhimit të raketave balistike ruse, si dhe masa që kufizojnë financat e Moskës.
“Së fundmi, bëhet fjalë për masa që e kufizojnë luftën”, theksoi presidenti ukrainas, transmeton Telegrafi.
Duke iu referuar Shteteve të Bashkuara, Zelensky tha se është e rëndësishme që projektligji i senatorit Lindsey Graham për sanksionet ndaj Rusisë të miratohet përfundimisht dhe të hyjë në fuqi.
Projektligji kishte kaluar në Senat me një mbështetje të gjerë dypartiake, ndërsa Zelensky kërkoi që procesi të përfundojë me shndërrimin e tij në ligj.
Sipas presidentit ukrainas, forcimi i sanksioneve evropiane dhe amerikane mbetet një nga mënyrat kryesore për të rritur presionin mbi Moskën dhe për të kufizuar kapacitetin e saj për të financuar dhe zhvilluar luftën në Ukrainë. /Telegrafi/
