Massimiliano Allegri është tashmë nën presion te Napoli, pas një fillimi zhgënjyes të sezonit, ndërsa në Itali ka nisur të qarkullojë edhe emri i trajnerit që mund ta zëvendësojë atë në rast se drejtuesit vendosin për një ndryshim në pankinë.
Napoli pësoi të martën mbrëma humbjen e tretë radhazi në të gjitha garat, pasi u mposht në shtëpi nga Arsenali me rezultat 0-1, në ndeshjen hapëse të fazës së ligës në Ligën e Kampionëve. Kjo humbje erdhi pas dy disfatave radhazi në Serie A, ndaj Comos dhe Interit, duke e futur skuadrën në një situatë të papritur në këtë fillim të sezonit.
Edhe pse paraqitja ndaj Arsenalit ishte në përgjithësi më pozitive dhe Napoli krijoi disa mundësi për të shmangur humbjen, rezultatet e fundit kanë ngritur shqetësime serioze në hierarkinë e klubit. Tri humbje radhazi në një periudhë kaq të hershme të sezonit kanë bërë që pozita e Allegrit të mos konsiderohet më e sigurt.
De Laurentiis i pakënaqur, Palladino në pritje
Sipas gazetarit Giovanni Scotto, i cili foli për “Radio Radio”, presidenti i Napolit, Aurelio De Laurentiis, është thellësisht i pakënaqur me fillimin e dobët të ekipit. Pakënaqësia e tij, sipas raportimeve në Itali, është e ngjashme me atë që po shfaqet edhe në mesin e tifozëve napolitanë, të cilët kanë filluar të humbin durimin.
Allegri tani është nën presion për të dhënë një përgjigje të menjëhershme. Napoli do të luajë të dielën pasdite në transfertë ndaj Bolognës, në “Stadio Renato Dall’Ara”, dhe një tjetër rezultat negativ mund ta përshpejtojë situatën rreth trajnerit.
Nëse Napoli dështon të rikthehet te fitorja, drejtuesit mund të fillojnë të mendojnë seriozisht për një ndryshim në pankinë. Në këtë skenar, emri i Raffaele Palladinos ka filluar të përmendet si një prej kandidatëve kryesorë.
Palladino aktualisht shihet si një opsion potencial në rast se De Laurentiis vendos të ndërpresë bashkëpunimin me Allegrin gjatë sezonit. Ish-trajneri i Fiorentinës është tashmë në radarin e klubit dhe mund të jetë një prej emrave të parë që do të merreshin në konsideratë në rast të një ndryshimi.
Allegri kërkon reagim të menjëhershëm
Situata është edhe më interesante duke pasur parasysh pritshmëritë e mëdha që shoqëruan ardhjen e Allegrit në Napoli. Trajneri me përvojë të madhe në futbollin italian u emërua me synimin për ta mbajtur Napolin në majë të Serie A dhe për të bërë një paraqitje sa më të mirë në Ligën e Kampionëve.
Por pas vetëm pak ndeshjesh, skuadra ka hyrë në një seri negative që askush në klub nuk e kishte parashikuar.
Napoli tashmë ka humbur ndaj Comos, Interit dhe Arsenalit, ndërsa ndeshja ndaj Bolognës mund të jetë shumë e rëndësishme për të ardhmen e Allegrit.
Në klub ende nuk ka një vendim përfundimtar dhe Allegri mbetet trajneri i Napolit. Megjithatë, presioni është rritur ndjeshëm dhe trajneri italian e di se duhet të reagojë sa më shpejt.
Një fitore në Bologna do t’i jepte skuadrës dhe Allegrit kohë për të marrë frymë dhe për ta kthyer situatën në rrugën e duhur. Në të kundërt, një tjetër rezultat zhgënjyes mund ta bëjë gjithnjë e më real skenarin e një ndryshimi në bankinë, me Palladinon që tashmë po shihet si një kandidat serioz për ta marrë drejtimin e Napolit./Telegrafi/
