Shihemi në ‘Prishtina 2030’ – Lojërat Mesdhetare mbyllen me flamurin e Kosovës

Në ceremoninë mbyllëse të Lojërave Mesdhetare “Taranto 2026”, flamuri i Lojërave Mesdhetare iu dorëzua zyrtarisht Kosovës, duke shënuar kalimin e organizimit te Prishtina, nikoqire e edicionit të vitit 2030.

Flamurin e pranoi kryetari i Prishtinës, Përparim Rama, në një moment historik që shënon nisjen zyrtare të rrugëtimit drejt organizimit të Lojërave Mesdhetare “Prishtina 2030”.

Lexo edhe nga Sport

Ronaldo “ia vjedh” golin shokut të skuadrës, shënon të 978-in në karrierë Cristiano Ronaldo vazhdon të shkruajë historinë e tij në futboll, duke shënuar golin e 978-të në karrierën profesionale,...

Para më shumë se 20 mijë shikuesve në stadium, flamuri i Kosovës u ngrit përkrah flamurit të Italisë dhe atij të Lojërave Mesdhetare.

Flamurin e Kosovës e dorëzoi basketbollisti Adhurim Alijaj, ndërsa ngritja e tij u shoqërua me intonimin e himnit shtetëror të Kosovës.

Gjatë ceremonisë u prezantua edhe videoja promovuese e “Prishtina 2030”, përmes së cilës publiku u njoh me Kosovën dhe kryeqytetin si nikoqirin e ardhshëm të Lojërave Mesdhetare.

Para ceremonisë së dorëzimit, flamurin e Kosovës në ceremoninë mbyllëse të “Taranto 2026” e bartën karateisti Islam Selmani dhe karateistja Fortesa Orana.

Në stadium ishin të pranishëm edhe drejtuesit e Komitetit Olimpik të Kosovës, me presidentin Ismet Krasniqi. /Telegrafi/