Ish-oficeri i inteligjencës marokene Mehdi Hijaouy raportohet se i ofroi autoriteteve spanjolle informacione mbi shërbimet sekrete të Marokut, në këmbim të mbrojtjes nga një ekstradim i mundshëm drejt vendit të tij.
Sipas The Objective, Hijaouy kontaktoi gjatë verës së vitit 2024 persona të afërt me ish-shefin e inteligjencës ushtarake venezueliane, Hugo Carvajal, me synimin për t’u ofruar autoriteteve spanjolle informacion në këmbim të mbrojtjes, transmeton Telegrafi.
Në atë kohë, Hijaouy ndodhej në Francë. Ai raportohet se ishte detyruar të largohej nga Maroku pas një konflikti me disa kolegë të tij në shërbimet e inteligjencës. Më vonë u zhvendos në Spanjë, duke pretenduar se kishte frikë për sigurinë e tij dhe të familjes.
Hijaouy iu drejtua një avokati që më herët kishte marrë pjesë në përpjekjet për të bindur Hugo Carvajal të bashkëpunonte me autoritetet spanjolle, ndërsa ai përpiqej të shmangte ekstradimin drejt Shteteve të Bashkuara.
Carvajal, ish-drejtor i inteligjencës ushtarake të Venezuelës, u arrestua në Spanjë në vitin 2021 dhe më vonë u ekstradua në SHBA, ku u përball me akuza për narko-terroristizëm dhe trafik droge.
Sipas burimeve të cituara nga The Objective, Hijaouy pretendonte se kishte informacione mbi mënyrën se si funksionojnë shërbimet e inteligjencës së Marokut dhe ishte i gatshëm t’ua dorëzonte ato autoriteteve spanjolle.
Oferta, përmes një ndërmjetësi, mbërriti në Prokurorinë Publike të Audiencia Nacional, e drejtuar nga Jesús Alonso.
Sipas dokumenteve të publikuara nga gazeta ABC, më 7 tetor 2024 u dërgua një email që paraqiste zyrtarisht ofertën.
Hijaouy deklaroi se mund të ofronte informacione edhe mbi përdorimin e spyware-it Pegasus për të shënjestruar kryeministrin spanjoll Pedro Sánchez, si dhe të dhëna lidhur me terrorizmin dhe krimin e organizuar.
Prokuroria iu përgjigj ofertës më 28 tetor. Një ndihmës i prokurorit Alonso tha se, meqë çështja e Pegasus ishte tashmë në duart e gjykatës, informacioni duhej t’i përcillej gjyqtarit që po hetonte rastin.
Megjithatë, sipas burimeve gjyqësore të cituara nga ABC, oferta nuk arriti kurrë te gjyqtari José Luis Calama.
Pasi hoqi dorë nga mundësia për të bashkëpunuar me autoritetet spanjolle, Hijaouy filloi të shqyrtonte mundësinë e largimit nga vendi.
The Objective raportoi se ai kishte konsideruar zhvendosjen në Kanada ose Algjeri, mes vendeve të tjera.
Në fund, ai u largua nga Spanja fillimisht me anije dhe më pas me avion privat, përpara se të mbërrinte në Turqi.
Që nga ajo kohë, Hijaouy është larguar edhe nga Turqia drejt një destinacioni tjetër, ndërsa vendndodhja e tij aktuale mbetet e panjohur.
