Përfshirja e Pep Guardiolës në çështjen financiare të Manchester Cityt mund t’i dëmtojë shanset e tij për të marrë drejtimin e Kombëtares së Anglisë në të ardhmen, sipas gazetarit spanjoll Guillem Balague.
Balague ka deklaruar se Federata Angleze e Futbollit (FA) kishte pritur për rreth dy muaj një përgjigje nga Guardiola, për të kuptuar nëse ai dëshironte të bëhej përzgjedhës i “Tre Luanëve”.
“A e dini se për dy muaj Pep Guardiola e la Federatën Angleze të priste për të parë nëse ai dëshironte të bëhej trajner i Anglisë?”, ka thënë Balague në talkSPORT.
Sipas tij, Guardiola në fund vendosi të qëndronte te Manchester City, duke rinovuar kontratën me klubin, ndërsa FA më pas emëroi Thomas Tuchelin në krye të Kombëtares.
“Në vend të kësaj, ai qëndroi te Manchester City, rinovoi kontratën dhe më pas ata zgjodhën Tuchelin. Në mendjen time, ai ka qenë gjithmonë kandidat për ta marrë drejtimin pas Tuchelit”, shtoi gazetari spanjoll.
Megjithatë, Balague beson se situata e krijuar rreth çështjes financiare të Manchester Cityt mund ta komplikojë një mundësi të tillë në të ardhmen.
“Për momentin, nuk mendoj se FA do të dëshironte të sillte dikë që do ta ndante botën, ose të paktën Anglinë, në mënyrën se si Pep Guardiola do ta bëjë nga tani e tutje”, deklaroi ai.
Guardiola ka qenë publikisht mbështetës i Manchester Cityt gjatë çështjes financiare, pasi një komision i pavarur e shpalli klubin fajtor për 114 shkelje të rregullave financiare të Ligës Premier. Megjithatë, procedurat ligjore dhe pasojat përfundimtare të kësaj çështjeje mbeten në zhvillim.
Balague gjithashtu sugjeroi se vetë Guardiola mund të mos jetë më i interesuar për postin e përzgjedhësit të Anglisë, duke argumentuar se spanjolli mund të dëshirojë të shmangë një situatë ku trashëgimia e tij vihet vazhdimisht në qendër të debatit.
“Ka shumë njerëz të interesuar për trashëgiminë e tij. Por, në sytë e tij, ishte një punë vërtet e mirë”, përfundoi Balague./Telegrafi/
