Boksierja kosovare, Donjeta Sadiku, e ka nisur në mënyrën më të mirë të mundshme Kampionatin Evropian të boksit “Sofje 2026”, duke regjistruar një fitore të pastër ndaj ruses Alina Pushkar.
Sadiku triumfoi me rezultat të thellë 5:0 në duelin e zhvilluar në Sofje të Bullgarisë, duke dominuar gjatë të tri raundeve.
Boksierja kosovare ishte bindëse në ring, ndërsa në raundin e dytë arriti edhe ta rrëzojë kundërshtaren, duke dëshmuar epërsinë e saj në këtë përballje.
Në fund, të pesë gjyqtarët e vlerësuan Sadikun si fituese, duke i dhënë asaj fitoren me rezultat të pastër 5:0.
Sadiku garon në kategorinë deri në 60 kilogramë dhe me këtë triumf ka siguruar kalimin në fazën tjetër të Kampionatit Evropian, ku do të kërkojë të vazhdojë rrugëtimin drejt medaljes. /Telegrafi/
