Arda Guler ka pësuar një transformim të madh fizik që nga transferimi te Real Madridi, duke shtuar rreth 12 kilogramë masë muskulore gjatë tri sezoneve të fundit.
Mesfushori turk iu bashkua klubit madrilen në moshën 18-vjeçare, kur peshonte 63 kilogramë, ndërsa tani peshon 75 kilogramë. Sipas gazetarit Marcos Benito, Guler ka ulur gjithashtu përqindjen e yndyrës trupore me 1.2 për qind.
Zhvillimi i tij fizik ka ardhur paralelisht me rritjen e besimit në paraqitjet e tij. Guler zhvilloi atë që u cilësua si pjesa e parë më e mirë e tij që nga transferimi te Real Madridi, duke impresionuar me përfshirjen në lojë dhe qetësinë me topin.
21-vjeçari po aktivizohet gjithnjë e më shumë në rolin e mesfushorit, një pozicion ku duket se ndihet më rehat dhe ku mund të ndikojë më shumë në lojë.
Ai ka marrë gjithashtu përgjegjësi për goditjet standarde dhe është shfaqur i sigurt në kërkimin e topit nga bashkëlojtarët.
Me gjendjen fizike që tani konsiderohet në një nivel shumë të lartë, Güler duket gjithnjë e më i gatshëm për të marrë një rol të rëndësishëm në planet e Real Madridit. /Telegrafi/
