Një kërkues metalesh ka bërë një zbulim të rrallë në një fushë pranë Highclere Castle, vendi i njohur si një nga lokacionet kryesore të serialit Downton Abbey.
Nick Berry, 58 vjeç, zbuloi një varëse ari rreth 1,000-vjeçare, që besohet se i përket periudhës anglo-saksone, gjatë një aktiviteti të organizuar për kërkimin e metaleve në fshatin Ashmansworth, Hampshire.
Berry, i cili merret me kujdesin social dhe ka më shumë se 30 vjet përvojë në këtë aktivitet, tha se sinjali i detektorit e çoi drejt një objekti të artë që ndodhej nën tokë.
“E gërmova dhe, sapo pashë në vrimë, dallova shkëlqimin e arit. E nxora me shumë kujdes dhe pata një ndjesi të çuditshme, madje u emocionova”, rrëfeu ai, transmeton Telegrafi.
Kur pastroi dheun, Berry kuptoi se objekti kishte formën e një dore. Ai tha se e kuptoi menjëherë se bëhej fjalë për diçka të pazakontë dhe se mund t’i përkiste periudhës anglo-saksone.
Ekspertët besojnë se varësja përfaqëson simbolikisht “Dorën e Zotit”, një simbol me lidhje të forta me krishterimin në periudhën e vonë anglo-saksone dhe asaj vikinge.
Julian Evan-Hart, redaktor i revistës Treasure Hunting, e cilësoi zbulimin si “të jashtëzakonshëm”, duke thënë se objekti duket të jetë unik. Sipas tij, bazuar në stilin e pjesës së sipërme dhe unazës së varëses, ajo ka shumë gjasa të datojë nga periudha e mesme anglo-saksone.
Eksperti shtoi se një objekt i tillë do të kishte pasur rëndësi simbolike dhe se pronari i tij ka shumë gjasa të ketë qenë një person me status shumë të lartë shoqëror, ndoshta pjesë e fisnikërisë së kohës.
Varësja peshon vetëm 1.6 gramë, ndërsa Berry thotë se ari duket të jetë i një pastërtie të lartë. Ai beson se objekti është përdorur si talisman dhe është mbajtur rreth qafës.
Zbulimi u raportua te zyrtari lokal për gjetjet arkeologjike dhe objekti tashmë ndodhet në British Museum, i cili e ka shpallur atë një thesar që duhet të ruhet për kombin, për shkak të veçantisë së tij.
Berry pranon se mund të mos e ketë më në pronësi varësen, por thotë se për të ky mbetet “zbulimi i jetës”.
Highclere Castle, rreth 11 minuta me makinë nga vendi ku u gjet varësja, shërben si një nga lokacionet kryesore të serialit të famshëm televiziv Downton Abbey. /Telegrafi/
