Një burrë nga Hungaria ka hyrë në Guinness World Records pasi koleksioni i tij arriti në rreth 2,000 kanaçe të ndryshme pijesh energjike.
Gergő Borbély tregoi se gjithçka nisi në një ditë shumë të nxehtë gushti në vitin 2008, kur ishte student dhe hyri në një dyqan pranë konviktit për të blerë një pije të ftohtë.
Aty provoi për herë të parë një pije energjike dhe i pëlqeu.
Në fillim, kanaçet u grumbulluan në dhomën e tij.
Kur vendosi t’i çonte për riciklim, ndryshoi mendje dhe ruajti nga një kanaçe të çdo lloji.
Nga rreth 15 kanaçe, koleksioni nisi të rritej vit pas viti.
Borbély ka mbledhur kanaçe nga udhëtimet në Japoni, SHBA dhe vende të ndryshme të Evropës, duke përfshirë edhe modele të rralla, si pijet energjike “Michael Jackson Mystery” të viteve ’90 dhe një kanaçe të vjetër Guarana të prodhuar në ish-Jugosllavi.
Sot, koleksioni i tij përbëhet nga 2,000 kanaçe, duke i siguruar rekordin botëror.
“Po të më kishte thënë dikush në vitin 2008 se disa kanaçe do të më çonin një ditë në Guinness World Records, me siguri do të kisha qeshur”, tha Borbély. /Telegrafi/
