Shpërthime janë dëgjuar sot në Rijad, ndërsa një kolonë e madhe tymi të zi dhe flakë janë parë pranë aeroportit ndërkombëtar “King Khalid”, disa orë pasi autoritetet saudite u dërguan banorëve të kryeqytetit një paralajmërim për rrezik ajror.
Një gazetar i AFP-së në vendngjarje pa zjarrfikësit duke shuar një rezervuar karburanti që kishte marrë flakë dhe që mbante shenjën e gjigantit saudit të naftës, Aramco.
Edhe fotografitë e Reuters treguan një kolonë të madhe tymi të zi që ngrihej nga zona e magazinimit të karburantit pranë aeroportit. Autoritetet saudite ende nuk kanë bërë të ditur shkakun e zjarrit dhe nuk e kanë lidhur zyrtarisht atë me ndonjë sulm të rebelëve Huthi.
Në aeroportin “King Khalid” janë regjistruar vonesa të mëdha dhe anulime fluturimesh. Flightradar24 e vendosi aeroportin në nivelin më të lartë të indeksit të çrregullimeve, që nënkupton vonesa të konsiderueshme dhe anulime të shumta. Dëshmitarët thanë për Reuters se pas paralajmërimit dëgjuan disa shpërthime. “Në drejtim të aeroportit pamë tym të zi dhe zjarr”, tha një banor.
Mbrojtja civile saudite gjatë natës u dërgoi banorëve të Rijadit një paralajmërim se zona ndodhej nën “kërcënim ajror armiqësor” dhe u bëri thirrje të qëndronin brenda. Më vonë u njoftua se rreziku kishte kaluar. Ky ishte paralajmërimi i parë i tillë në kryeqytetin saudit që nga përshkallëzimi i luftimeve me Huthit në Jemenin fqinj.
Huthit, të mbështetur nga Irani, kanë kryer gjatë javëve të fundit një seri sulmesh me dronë dhe raketa ndaj Arabisë Saudite.
Të enjten, një person u vra dhe dy të tjerë u plagosën pasi mbetjet e një droni të kapur nga mbrojtja ajrore ranë në zonën e Taifit. Arabia Saudite më herët kishte deklaruar se kishte kapur edhe një dron që po fluturonte në drejtim të Mekës, ndërsa Huthit mohuan se kishin shënjestruar qytetin e shenjtë.
Përplasja është përshkallëzuar pas përparimit të madh të Huthive përgjatë bregdetit të Detit të Kuq. Ata kanë marrë portin strategjik të Mokhas dhe ishullin Perim në ngushticën Bab el-Mandeb, një nga rrugët kryesore detare në botë.
Arabia Saudite mbështet qeverinë e njohur ndërkombëtarisht të Jemenit dhe ditët e fundit ka kryer një numër të madh sulmesh ajrore ndaj pozicioneve të Huthive. Megjithatë, deri tani nuk ka konfirmim zyrtar se shpërthimet dhe zjarri pranë aeroportit në Rijad janë pasojë e një sulmi të Huthive. /Telegrafi/
