Aktori James McAvoy zbuloi së fundmi se si fëmijë kishte dëshirë t’i përkushtohej fesë dhe të bëhej prift.
I rritur në Glasgou, ai besonte se të bëhej prift do ta lejonte të përmbushte dëshirën e tij për të udhëtuar dhe për të parë botën. Megjithatë, planet e tij ndryshuan kur hyri në pubertet dhe filloi të mendonte ndryshe për jetën.
“E mendova shumë seriozisht. Doja të udhëtoja. Doja të arratisesha dhe mendova se priftëria mund të ishte një mënyrë e mirë për ta bërë këtë. Po mendoja konkretisht për punën misionare sepse mendoja se mund të udhëtoja në vende të mrekullueshme”, tha aktori 47-vjeçar.
McAvoy tha se ishte 13 vjeç në atë kohë dhe nuk kishte menduar shumë për beqarinë.
“Nuk mendoj se e vlerësova vërtet idenë e beqarisë. Kur fillova të mendoja për vajzat, priftëria në një farë mënyre u zhduk”, zbuloi ai.
Ai iu rikthye fesë në ekran në veprën e tij të re, dramën mbinatyrore “Faith” nga shkrimtari dhe regjisori Paul Andrew Williams, e cila u shfaq premierë në Festivalin Ndërkombëtar të Filmit në Toronto më 11 shtator.
Në film, McAvoy luan një personazh misterioz me sekrete shqetësuese, ndërsa aktorja Erin Doherty luan nënën e pikëlluar. Aktori reflektoi gjithashtu mbi bisedat në shesh xhirimi rreth besimit dhe qëndrimin e tij aktual ndaj fesë dhe artit.
“Në shesh xhirimi, njerëzit më pyesnin: ‘A beson në Zot?’ Dhe unë thoja: ‘Nuk mendoj kështu.’ Dhe ata thoshin: ‘Oh, pse po e bën këtë film?’ Dhe unë thoja: ‘Epo, unë bëj filma për superheroj dhe magjistarë, dhe ata nuk ekzistojnë’”, shpjegoi ai.
Pavarësisht se u rrit duke ëndërruar të bëhej prift, ai tha se definitivisht nuk është fetar tani dhe nuk është veçanërisht shpirtëror.
Filmi “Faith” ende nuk ka një datë zyrtare publikimi pas premierës së tij në TIFF. Përveç këtij arritjeje, McAvoy po punon në mini-serialin “Meantime” dhe trillerin “Control”, dhe pritet gjithashtu të bëjë debutimin e tij regjisorial me komedinë skoceze “California Schemin”, e cila mbërrin në kinema më 9 tetor.
