Roveri Perseverance i NASA-s ka zbuluar dëshmi se uji ka ndërvepruar disa herë me shkëmbinjtë në kraterin Jezero në Mars, përfshirë edhe një periudhë kur ujërat e nxehta nëntokësore kanë qarkulluar nën sipërfaqen e lashtë të planetit.
Zbulimi vjen nga një zonë pranë skajit të kraterit Jezero, e njohur si Margin Unit, të cilën Perseverance po e eksploron që nga viti 2023.
Vëzhgimet e roverit tregojnë se në këtë zonë kanë ndodhur të paktën tri episode të ndryshme të ndërveprimit të ujit me shkëmbinjtë marsianë. Njëra prej tyre lidhet me qarkullimin e ujërave të nxehta nëntokësore.
Shkencëtarët fillimisht prisnin të gjenin shkëmbinj sedimentarë të krijuar në brigjet e një liqeni të lashtë që dikur mbushte kraterin. Megjithatë, roveri zbuloi shkëmbinj magmatikë, të formuar nga materiale të shkrira thellë nën sipërfaqe ose gjatë aktivitetit vullkanik.
Duke përdorur instrumentin SuperCam, studiuesit analizuan më shumë se 185 zona në shkëmbinjtë e Margin Unit dhe gjetën prova se uji i ka ndryshuar ato gjatë periudhave të ndryshme.
Një nga episodet lidhet me ujërat nëntokësore të pasura me dioksid karboni, të cilat reaguan me olivinën dhe krijuan minerale karbonate. Një tjetër lidhet me liqenin e lashtë të Jezeros, ndërsa një episod i tretë, më i nxehtë, lidhet me qarkullimin e ujit përmes shkëmbinjve vullkanikë.
Zbulimi është veçanërisht interesant për shkencëtarët, pasi sistemet hidrotermale në Tokë mund të krijojnë mjedise që mbështesin jetën mikrobike. Për këtë arsye, prania e ujërave të nxehta të lashta në Mars mund të ndihmojë në studimin e kushteve që dikur mund të kenë qenë të përshtatshme për jetë.
Megjithatë, studiuesit ende nuk mund të përcaktojnë saktësisht se kur kanë ndodhur këto episode. Sipas tyre, zona e Margin Unit nuk ishte vetëm një brigj i lashtë liqeni, por një pikë ku ujërat nëntokësore, ujërat sipërfaqësore dhe lëngjet e nxehta ndërvepronin me shkëmbinjtë e Marsit. /Telegrafi/
