Jamie Carragher ka paralajmëruar se gara për titullin në Ligën Premier mbetet e hapur, pavarësisht barazimit dramatik 3-3 të Manchester City ndaj Evertonit.
Ish-mbrojtësi i Liverpoolit theksoi se City ende përballet me një sfidë të vështirë në ndeshjet e mbetura, duke qenë se ndodhet pesë pikë pas liderit Arsenal. Sipas tij, një nga testet më të mëdha për skuadrën e Pep Guardiolës do të jetë përballja në udhëtim ndaj Bournemouth, ekip që po kalon një formë shumë të mirë.
“Është një ndeshje e vështirë jashtë fushe, ata janë në formë të shkëlqyer”, u shpreh Carragher.
Ai gjithashtu u ndal te situata e Arsenalit, duke theksuar se londinezët e kanë fatin në duart e tyre, me vetëm tri ndeshje të mbetura deri në fund të sezonit.
“Nga perspektiva e Arsenalit, sonte është për ligën, por a mund ta imagjinoni atmosferën në stadium për ndeshjen e kthimit në gjysmëfinale të Ligës së Kampionëve? Emocioni dhe energjia e tifozëve do të jenë të jashtëzakonshme”, shtoi ai.
Carragher beson se një fitore e Arsenalit ndaj West Ham në fundjavë mund të jetë vendimtare për titullin.
“Nëse Arsenali fiton kundër West Ham të dielën e ardhshme, ata e fitojnë titullin”, përfundoi ai.
Gara për titull në Angli mbetet kështu një nga më emocionueset e viteve të fundit, me Arsenalin në avantazh, por me Manchester City që nuk dorëzohet deri në fund./Telegrafi/
