Të përzierat janë një nga simptomat më të zakonshme të migrenës dhe mund të shfaqen para, gjatë ose pas një ataku.
Në disa raste, ndjenja e të përzierave mund të shoqërohet edhe me të vjella, ndërsa te persona të tjerë mund të shfaqet vetëm njëra prej tyre.
Një studim i vitit 2019, ku morën pjesë 6,045 persona me migrenë, tregoi se rreth 65 për qind kishin të përziera së bashku me ndjeshmëri ndaj dritës dhe zhurmave gjatë episodeve të migrenës.
Pse ju vjen për të vjellë kur keni migrenë? telegrafi.com
Për rreth 28 për qind të tyre, të përzierat ishin simptoma më shqetësuese. Ato mund të shfaqen gjatë fazave të ndryshme të migrenës, përfshirë periudhën para dhimbjes së kokës dhe gjatë saj.
Shkaku i saktë i të përzierave gjatë migrenës nuk është ende i qartë. Një nga shpjegimet është se faktorë të tillë si stresi mund të aktivizojnë sistemin nervor qendror, i cili kontrollon edhe funksione të pavullnetshme të trupit, përfshirë tretjen.
Te disa persona me migrenë mund të ndodhë edhe zbrazje më e ngadaltë e stomakut, gjë që mund të shkaktojë të përziera dhe të vjella.
Të përzierat mund të shfaqen me lloje të ndryshme të migrenës, përfshirë migrenën me ose pa aurë.
Për lehtësimin e simptomave, mjeku mund të rekomandojë barna kundër të përzierave. Përveç trajtimit medikamentoz, disa persona mund të përfitojnë edhe nga metoda si akupresura, xhenxhefili ose aromaterapia me vaj menteje.
Për të ulur mundësinë e shfaqjes së këtyre simptomave, ndihmojnë gjumi i rregullt, ushqyerja në intervale të qëndrueshme, aktiviteti fizik, menaxhimi i stresit dhe identifikimi i faktorëve që nxisin migrenën.
Mbajtja e një ditari të dhimbjeve të kokës mund të ndihmojë në zbulimin e këtyre shkaktarëve. Nëse të përzierat shfaqen në fund të një ataku, trajtimi i migrenës që në fazat e para mund të jetë i dobishëm, veçanërisht për të shmangur të vjellat pas marrjes së barnave.
Nëse një person vjell pas marrjes së ilaçit për migrenën, ilaçi mund të mos përthithet siç duhet.
Në këtë rast, nuk duhet marrë automatikisht një dozë tjetër pa u këshilluar me mjekun, pasi koha e përthithjes ndryshon sipas medikamentit.
Gjithashtu, ekspertët nuk rekomandojnë shkaktimin e qëllimshëm të të vjellave për të ndalur migrenën. /Telegrafi/
