Barcelona ka konfirmuar se Andreas Christensen do të mungojë për disa javë për shkak të një lëndimi në kofshë.
Qendërmbrojtësi danez e pësoi lëndimin gjatë fitores 3-1 ndaj Sevillas mbrëmjen e kaluar, ndërsa tashmë pritet të qëndrojë jashtë fushave për një periudhë të caktuar.
Klubi katalunas ka bërë të ditur se ekzaminimet mjekësore kanë konfirmuar një dëmtim në kofshën e majtë të Christensenit.
“Ekzaminimet kanë konfirmuar se lojtari i ekipit të parë, Andreas Christensen, ka pësuar një dëmtim në kofshën e majtë. Ai do të jetë i padisponueshëm për momentin dhe evoluimi i gjendjes së tij do të përcaktojë rikthimin në fushë”, thuhet në njoftimin e Barcelonës.
Në favor të Christensenit është pushimi i gjatë ndërkombëtar, i cili pritet t’i japë më shumë kohë për rikuperim dhe mund t’ia lehtësojë rikthimin në kohë për ndeshjet e ardhshme.
Barcelona do t’i rikthehet aksionit në La Liga më 10 tetor, kur do të përballet me Getafen./Telegrafi/
