Audi A4 E-Tron, një prej modeleve që pritej të shënonte kalimin e Audi-t drejt gjeneratës së re të automjeteve elektrike, nuk do të hyjë në prodhim para marsit 2029.
Afati i ri është rreth nëntë muaj më i vonë se objektivi i vendosur më parë nga drejtori ekzekutiv i Audi-t, Gernot Döllner, i cili në tetor 2025 kishte parashikuar nisjen e prodhimit në mesin e vitit 2028.
Sipas raportimeve të Handelsblatt, edhe data e marsit 2029 mund të shtyhet më tej, deri në fund të prillit ose fillim të majit të atij viti, transmeton Telegrafi.
Vonesa lidhet me vështirësi teknike në Scalable Systems Platform (SSP), arkitekturën e re elektrike të Volkswagen Group, e cila është prezantuar si baza e gjeneratës së ardhshme të automjeteve të kompanisë.
Një nga ndryshimet që ka shkaktuar probleme ishte vendimi për kalimin e sistemit elektrik të automjeteve nga standardi tradicional 12 volt në 48 volt, pasi zhvillimi i platformës kishte nisur tashmë.
Ky ndryshim ka sjellë punë shtesë inxhinierike për Volkswagen dhe furnitorët e tij, duke shtyrë më tej afatet e prodhimit.
Döllner e ka përshkruar vonesën si pjesë të vështirësive normale të zhvillimit dhe jo si ndryshim të planit për vetë modelin.
A4 E-Tron pritet të vijë në dy versione, sedan dhe Avant, me një dizajn të frymëzuar nga koncepti Concept C.
Volkswagen e prezantoi platformën SSP në vitin 2021, duke e konceptuar si pasardhëse të arkitekturës MEB, të përdorur në modele si Q4 E-Tron, dhe platformës 800-volt PPE, mbi të cilën bazohen modele si A6 E-Tron dhe Q6 E-Tron.
Megjithatë, pesë vjet më vonë, SSP ende nuk ka nxjerrë asnjë automjet në prodhim.
Sipas Handelsblatt, me nisjen e re të parashikuar për pranverën e vitit 2029, platforma do të jetë rreth tre vjet pas afatit fillestar të vitit 2026.
Volkswagen ka reduktuar gjithashtu numrin e varianteve të planifikuara të SSP-së, nga tetë në katër, duke e cilësuar këtë si një vendim strategjik.
Problemet me SSP nuk kufizohen vetëm te Audi A4 E-Tron. Edhe Golf-i elektrik dhe T-Roc-u elektrik përballen me vonesa që mund ta shtyjnë prodhimin deri në vitin 2030.
Ndërkohë, modelet e Volkswagen të zhvilluara me teknologjinë e partnerit amerikan Rivian pritet të mbërrijnë vetëm “nga fundi i dekadës”.
Kjo do të thotë se modelet elektrike të Audi-t të bazuara në platformat aktuale MEB dhe PPE do të mbeten pjesë e gamës për më gjatë nga sa ishte planifikuar, ndërsa gjenerata e re e automjeteve elektrike të markës gjermane vazhdon të përballet me shtyrje.
