Zinedine Zidane u rikthye në stadiumin ku kishte përjetuar një prej momenteve më të rëndësishme të fillimit të karrierës së tij me fanellën e Francës. Këtë herë, megjithatë, legjenda franceze nuk ishte në fushë si futbollist, por në një rol krejt tjetër, duke udhëhequr “Gjelat” në një mbrëmje të mbushur me emocione dhe kujtime.
Franca u përball me Italinë të premten mbrëma në “Stade de France”, në kuadër të xhiros së tretë të Ligës së Kombeve. Kjo ndeshje kishte një domethënie të veçantë për Zidanen, pasi ishte hera e parë që ai zbriste në fushën e stadiumit kombëtar që nga marrja e drejtimit të përfaqësueses franceze.
Para fillimit të takimit, tifozët francezë e pritën me ovacione të mëdha legjendën e tyre. Sapo spikeri shqiptoi emrin e Zidanes, i gjithë stadiumi shpërtheu në brohoritje dhe duartrokitje, duke treguar edhe një herë respektin e madh që publiku francez ka për të.
Por surprizat nuk përfunduan me duartrokitjet. Në tribunat e stadiumit u shpalos edhe një pankartë gjigante në nder të tij, me mbishkrimin: “Zizou, mirë se u ktheve në shtëpi”.
Pankarta ishte përgatitur nga grupi francez i tifozëve “Irresistibles”, duke i dhënë rikthimit të Zidanes një atmosferë edhe më të veçantë dhe emocionuese.
Kjo ndeshje kishte edhe një simbolikë tjetër për ish-futbollistin e Real Madridit.
Pikërisht 28 vjet më parë, në të njëjtin stadium, Zidane kishte shënuar golat e tij të parë me fanellën e Francës, duke nisur një rrugëtim historik me “Gjelat”, që më vonë do të kurorëzohej me suksese të mëdha./Telegrafi/
