Përfaqësuesja e Lartë e BE-së për Politikën e Jashtme, Kaja Kallas, i ka kërkuar Iranit që pas përfundimit të luftës të garantojë kalim të lirë dhe të papenguar të anijeve në Ngushticën e Hormuzit.
Kallas u takua në Nju Jork me ministrin e Jashtëm iranian, Abbas Araghchi, në kuadër të Asamblesë së Përgjithshme të OKB-së, ku diskutuan rrugët diplomatike për t’i dhënë fund konfliktit mes SHBA-së dhe Iranit dhe për të rikthyer plotësisht lundrimin në Hormuz.
Pas takimit, Kallas tha se anijet nuk duhet të paguajnë tarifa për të kaluar nëpër ngushticë pasi konflikti të përfundojë. Ajo theksoi se para luftës nuk ekzistonin tarifa të tilla dhe se lundrimi duhet të jetë “i lirë dhe i papenguar”, jo vetëm në Hormuz, por edhe në ngushticën Bab al-Mandab, në jug të Detit të Kuq.
Kallas tha gjithashtu se me Araghchin diskutoi situatën e brendshme në Iran, duke shprehur shqetësim për rritjen e ndjeshme të ekzekutimeve dhe dënimeve me vdekje, transmeton Telegrafi.
Takimi u zhvillua në një moment kur negociatorët amerikanë dhe iranianë po zhvillonin bisedime indirekte në Nju Jork. Në krahun amerikan morën pjesë Steve Witkoff dhe Jared Kushner, ndërsa delegacioni iranian drejtohej nga Araghchi. Witkoff tha se palët kishin përfunduar me sukses një raund diskutimesh dhe se një tjetër pritet së shpejti.
Në fjalimin e tij në Asamblenë e Përgjithshme, presidenti amerikan Donald Trump tha se përballet me një “vendim të madh” lidhur me mundësinë e arritjes së një marrëveshjeje me Iranin, ndërsa dallimet mes dy palëve mbeten të mëdha.
Por kërkesa e Kallas për kalim pa tarifa përplaset me një masë të miratuar nga parlamenti iranian, i cili ka parashikuar gjoba për anijet që kalojnë nëpër Hormuz pa autorizim.
Ndërkohë, forcat Houthi të mbështetura nga Irani kanë intensifikuar sulmet ndaj Arabisë Saudite, duke hapur një tjetër front në luftën që nisi në shkurt.
Shërbimi Evropian për Veprimin e Jashtëm thotë se Kallas ka shkuar në Nju Jork me një mesazh të qartë dhe të përbashkët të BE-së: respektimi i të drejtës ndërkombëtare dhe Kartës së OKB-së, respektimi i sovranitetit dhe integritetit territorial, si dhe ndëshkimi i shkeljeve të së drejtës ndërkombëtare.
Kallas, presidenti i Këshillit Evropian António Costa dhe presidentja e Komisionit Evropian Ursula von der Leyen kanë përfaqësuar BE-në në takimet e nivelit të lartë në kuadër të Asamblesë së Përgjithshme, përfshirë diskutimet me Bashkimin Afrikan dhe sekretarin e përgjithshëm të OKB-së, António Guterres.
Sesioni i këtij viti i OKB-së zhvillohet nën temën “Rikthimi i besimit, menaxhimi i transformimit: një Kombe të Bashkuara që japin rezultate për të gjithë”. Në debatin e përgjithshëm pritet të flasin rreth 130 krerë shtetesh dhe qeverish, ndërsa punimet do të vazhdojnë deri më 28 shtator. /Telegrafi/
