Banorëve të Riadit, në Arabinë Saudite, u është dhënë sinjali se rreziku ka kaluar, pasi u lëshuan alarme për sulme ajrore dhe u raportuan shpërthime në kryeqytet.
Kjo ishte hera e parë që lëshoheshin alarme në Riad që kur Houthit shtuan sulmet e tyre dhe shpallën një “embargo detare” ndaj sauditëve në muajin korrik.
Mbrojtja Civile Saudite dërgoi alarme për kryeqytetin dhe disa rajone të tjera vonë të premten në mbrëmje dhe të shtunën në mëngjes (me orën lokale), ndërsa konflikti i Mbretërisë me Houthit e mbështetur nga Irani vazhdonte të përshkallëzohej.
Gazetarë të agjencive Reuters dhe AFP raportuan se dëgjuan shpërthime në kryeqytet, por autoritetet më pas deklaruan se rreziku kishte kaluar.
Megjithatë, banorët u këshilluan të shmangnin grumbullimet e mëdha.
Houthit së fundmi morën kontrollin e qytetit port strategjik të Mokha-s dhe ishullit Perim, një pikë kyçe hyrëse për një rrugë të rëndësishme detare që përdoret nga shteti i Gjirit për eksporte drejt Azisë dhe Evropës.
Zëdhënësi ushtarak i grupit të mbështetur nga Irani deklaroi se bllokada detare ishte një kundërpërgjigje ndaj bllokadës saudite të porteve dhe aeroporteve në Jemenin veriperëndimor, të kontrolluar nga Houthit.
Anijet saudite janë mbështetur te ajo pjesë e Detit të Kuq për eksportet e naftës, që kur lufta e SHBA-së dhe Izraelit me Iranin bëri që Ngushtica e Hormuzit të mbyllej praktikisht.
Javën e kaluar, Houthit sulmuan disa objekte saudite të naftës me dronë dhe raketa, duke shkaktuar zjarre që çuan në ndërprerjen e përkohshme të operacioneve.
Sulmet ndaj infrastrukturës saudite të naftës kanë ndikuar drejtpërdrejt në tregjet globale të energjisë; çmimi i benzinës dhe naftës është rritur ndjeshëm në shumë vende gjatë javëve të fundit, duke shtuar kostot tashmë të larta të shkaktuara nga bllokadat në Ngushticën e Hormuzit.
Princi i Kurorës së Arabisë Saudite, Mohammed bin Salman, sundimtari de facto i vendit, i ka kërkuar personalisht presidentit amerikan Donald Trump të ndërmarrë veprime ushtarake kundër Houthëve, sipas dy burimeve të njohura me çështjen, të cilat folën për CBS News, partnerin mediatik të BBC-së në SHBA.
Deri më tani, Trump ka refuzuar të përfshijë drejtpërdrejt ushtrinë amerikane, duke ofruar në vend të kësaj ndihmë me informacione të inteligjencës dhe mbështetje për identifikimin e objektivave, thanë burimet.
Një zyrtar i lartë i administratës Trump i tha BBC-së: “Ne jemi në dialog të vazhdueshëm me Arabinë Saudite dhe qeverinë e Republikës së Jemenit lidhur me stabilitetin rajonal”. /Telegrafi/
