Robert Moreno, përzgjedhësi i përkohshëm i Koresë së Jugut, është përballur me një pyetje të pazakontë në fillim të mandatit të tij, pasi një histori nga koha kur drejtonte Sochin në Rusi e ka ndjekur edhe në postin e ri.
Spanjolli është akuzuar se gjatë periudhës së tij te Sochi përdorte ChatGPT për përgatitjen e ndeshjeve, përzgjedhjen e lojtarëve dhe madje edhe për vendimet rreth transferimeve. Moreno i ka mohuar kategorikisht këto pretendime, duke i cilësuar si të pavërteta.
“Është një histori krejtësisht e rreme që është bërë virale”, deklaroi Moreno në konferencën për shtyp.
Ai pranoi se e ka përdorur teknologjinë, por theksoi se nuk ia kishte lënë vendimet sportive inteligjencës artificiale.
“E përdorja teknologjinë, ashtu si trajnerët e tjerë. Për shembull, përdorja ChatGPT edhe për përkthime, pasi nuk flisja rusisht. Nuk dua të shpenzoj shumë kohë me këtë çështje. Klubet dhe lojtarët tashmë e kanë shpjeguar se kjo histori nuk është e vërtetë”, shtoi trajneri spanjoll.
Ish-drejtori i Sochit kishte një version tjetër
Pretendimet ndaj Morenos u bënë publike më herët nga Andrei Orlov, ish-zëvendësdrejtor i përgjithshëm i Sochit.
Sipas Orlov, Moreno kishte filluar ta përdorte ChatGPT si një prej mjeteve kryesore në punën e tij si trajner.
Ai solli si shembull përgatitjet për një ndeshje në transfertë ndaj skuadrës së Khabarovskut. Sipas versionit të Orlov, Moreno kishte futur në ChatGPT të dhënat e udhëtimit dhe kishte marrë një plan sipas të cilit lojtarët praktikisht nuk do të flinin për rreth 28 orë.
Pas ndërhyrjes dhe paralajmërimit për problemin, plani thuhet se ishte futur sërish në sistem dhe ishte ndryshuar.
Orlov pretendoi gjithashtu se ChatGPT ishte përdorur edhe në kërkimin e një sulmuesi të ri. Sochi kishte marrë në konsideratë Vladimir Pisarskyn, Pavel Melyoshinin dhe Artur Shushenachevin, ndërsa të dhënat e tyre nga Wyscout, sipas tij, iu dhanë ChatGPT-së.
Sipas këtij versioni, inteligjenca artificiale e kishte vlerësuar Shushenachevin si opsionin më të mirë. Moreno e kishte kundërshtuar edhe atëherë këtë interpretim të mënyrës së tij të punës.
2023/12/Roberto-Moreno.jpg telegrafi.com
Moreno mori drejtimin e Koresë së Jugut
Moreno u emërua përzgjedhës i përkohshëm i Koresë së Jugut më 1 shtator, pas largimit të Hong Myung-bo, i cili dha dorëheqjen pas eliminimit të ekipit nga Kupa e Botës.
Spanjolli aktualisht do ta drejtojë përfaqësuesen koreano-jugore në gjashtë ndeshje miqësore.
Pas këtyre përballjeve, Shoqata Koreane e Futbollit do të vendosë nëse Moreno do të vazhdojë në detyrë dhe do t’i besohet drejtimi i ekipit në Kupën e Azisë 2027. /Telegrafi/
