Më shumë se tri dekada pas vdekjes së Selena Quintanilla-Perez, familja e këngëtares së njohur është përfshirë në një betejë ligjore për pasurinë e saj.
Vëllai i Selenës, AB Quintanilla, ka ngritur padi ndaj motrës së tij, Suzette Quintanilla Arriaga, dhe kompanisë së saj Q Productions, duke kërkuar më shumë se 1 milion dollarë (rreth 860 mijë euro).
Sipas dokumenteve ligjore, ai pretendon se nuk ka marrë pjesën e plotë të fitimeve që i takojnë nga aktivitetet dhe pronat argëtuese të lidhura me Selenën, shkruan DailyMail.
Q Productions merret me çështjet e argëtimit, të drejtat e pronësisë intelektuale, sipërmarrjet tregtare dhe trashëgiminë e Selenës.
Para ngritjes së padisë, Suzette dhe nëna e saj Marcella i mohuan akuzat për keqpërdorim të parave apo pronës së familjes.
“Nuk ka pasur vjedhje nga Suzette. Suzette nuk ka vjedhur, përvetësuar ose marrë në mënyrë të papërshtatshme para ose pronë që i përket AB, Abraham, Marcella, Chris, pasurisë së Selenës, apo ndonjë biznesi në pronësi familjare ose të përbashkët”, thuhej në deklaratë.
Në këtë përplasje është përfshirë edhe Chris Perez, bashkëshorti i Selenës nga viti 1992 deri në vdekjen e saj. Ai deklaroi se nuk është i përfshirë në asnjë kapacitet ligjor me asnjërën palë.
Selena u vra më 31 mars 1995 në Corpus Christi, Teksas, nga Yolanda Saldivar, ish-presidente e klubit të saj të fansave.
Saldivar u dënua me burgim të përjetshëm dhe vitin e kaluar iu refuzua lirimi me kusht. Ajo nuk do të jetë sërish e përshtatshme për lirim me kusht deri në mars të vitit 2030. /Telegrafi/
