Fisnik Asllani është një prej futbollistëve më të rëndësishëm të Kosovës në repartin ofensiv, por grumbullimi i tij me “Dardanët” vjen në një moment kur sulmuesi ende nuk është rikthyer plotësisht në ritmin e garave.
Asllani sapo është kthyer nga një dëmtim në gju dhe te Hoffenheimi aktivizimi i tij është menaxhuar me shumë kujdes.
Pas rikthimit në fushë, ai ka luajtur vetëm pak minuta në tri ndeshje, duke grumbulluar gjithsej rreth 32 minuta. Sipas të dhënave, ai luajti tetë minuta ndaj Stuttgartit, 15 ndaj OFI Kretës në Ligën e Evropës dhe dhjetë minuta ndaj Paderbornit.
Kjo e vendos Franco Fodën përpara një dileme. Kosova në dhjetë ditë do të luajë katër ndeshje në Ligën e Kombeve, duke nisur me Irlandën të enjten në “Fadil Vokrri”, ndërsa më pas përballen Austria, Izraeli dhe sërish Austria. Në një kalendar kaq të ngjeshur, menaxhimi i minutave të lojtarëve do të jetë tejet i rëndësishëm.
Për Fodën, Asllani është një opsion shumë i rëndësishëm në sulm, por mbetet për t’u parë nëse përzgjedhësi do ta përdorë që nga fillimi apo do të mundohet ta ruajë, sidomos në ndeshjet e para, shkruan Telegrafi.
Sulmuesi i Hoffenheimit ka nevojë për minuta për ta rikthyer ritmin, por njëkohësisht vjen nga një periudhë mungese dhe deri tani ka pasur vetëm paraqitje të shkurtra me klubin. Edhe Hoffenheimi kishte planifikuar që ngarkesa e tij të rritej gradualisht pas rikthimit nga dëmtimi.
Asllani, ndërkohë, ka dëshmuar tashmë se mund të jetë vendimtar për Kosovën. Ai ka shënuar katër gola me “Dardanët”, duke nisur me golin në fitoren ndaj Komoreve. Më pas, sulmuesi gjeti rrjetën në ndeshjet kualifikuese për Botërorin ndaj Suedisë dhe Sllovenisë, ndërsa golin e katërt e realizoi në fitoren dramatike 4-3 ndaj Sllovakisë në play-off.
Goli ndaj Sllovakisë ishte veçanërisht i rëndësishëm, pasi Asllani shënoi në minutën e 47-të për ta barazuar rezultatin në 2-2, në një ndeshje që Kosova përfundimisht e fitoi 4-3.
Ai ka kontribuar edhe në aspektin e asistimeve, duke qenë pjesë e repartit ofensiv që i ka dhënë Kosovës më shumë alternativa në ndeshjet e rëndësishme. Për këtë arsye, prania e tij në formën më të mirë fizike është një element i rëndësishëm për Fodën në serinë e katër ndeshjeve, shkruan Telegrafi.
Vlera e Asllanit në treg gjithashtu tregon rëndësinë që ka fituar ai. Transfermarkt e vlerëson aktualisht në 35 milionë euro, duke e bërë atë lojtarin me vlerën më të lartë të tregut te Kosova.
Tash mbetet të shihet se si do ta menaxhojë Foda situatën. A do t’i japë Asllanit minuta të kontrolluara për ta ruajtur fizikisht, apo rëndësia e ndeshjeve do ta detyrojë ta përdorë më shumë? Përgjigjja e parë pritet të merret të enjten ndaj Irlandës, në një seri ku Kosova nuk do të ketë shumë kohë për rikuperim mes ndeshjeve. /Telegrafi/
