Rusia ka goditur edhe një urë tjetër të rëndësishme në Kiev, ka konfirmuar kryetari i kryeqytetit ukrainas, Vitali Klitschko. Sulmi ka rritur presionin mbi infrastrukturën kryesore të qytetit.
Sipas Klitschkos, në sulmin e mëngjesit të së shtunës në Urën Veriore janë dëmtuar sipërfaqja e rrugës dhe rrjeti elektrik për trolejbusët. Sulmi pasoi disa goditje ruse me dronë ndaj Urës Jugore, e cila ishte shënjestruar disa herë që nga e enjtja.
Të dyja urat janë ndër lidhjet kryesore mes pjesës lindore dhe perëndimore të Kievit. Sulmet kanë shkaktuar ndërprerje dhe kufizime të qarkullimit, ndërsa transporti publik është detyruar të ndryshojë itineraret.
Sulmi i së shtunës ndodhi pak pas orës 06:30, pasi autoritetet kishin njoftuar për afrimin e dronëve drejt kryeqytetit. Në rrjetet sociale janë publikuar pamje të një shpërthimi në urë, ndërsa përmasat e plota të dëmeve ende po vlerësohen.
Sulmet ndaj urave kanë shkaktuar kaos në trafikun e Kievit. Tre nga gjashtë urat rrugore që lidhin dy pjesët e kryeqytetit janë mbyllur plotësisht ose pjesërisht, duke krijuar kolona të gjata dhe vonesa në transportin publik. Disa banorë janë detyruar të vazhdojnë rrugën në këmbë.
Ndërkohë, një tjetër sulm rus me dron goditi një ndërtesë 25-katëshe në lagjen Darnitski të Kievit. Sipas autoriteteve ukrainase, një person humbi jetën, dy u plagosën dhe gjashtë të tjerë u evakuuan.
Presidenti ukrainas, Volodymyr Zelensky tha se Rusia kishte lëshuar më shumë se 100 dronë drejt Ukrainës gjatë natës, ndërsa pothuajse gjysma e tyre ishin modele të reja me motorë reaktivë, të cilat, sipas tij, janë më të vështira për t’u interceptuar. /Telegrafi/
