Ministria e Mbrojtjes e Polonisë po harton një ligj të ri që synon ta përgatisë shtetin për një fazë të “paraluftës” ose të gatishmërisë së plotë mbrojtëse, përpara shpalljes zyrtare të gjendjes së luftës.
Projektligji do të mundësonte vendosjen më të hershme të trupave polake dhe aleate, si dhe përshtatjen e planeve kombëtare të mbrojtjes me sistemet dhe procedurat e NATO-s.
Sipas ministrisë, ligji do të krijonte gjithashtu mundësi për përgatitjen e infrastrukturës kritike dhe forcimin e kapaciteteve të shtetit në rast të rritjes së nivelit të kërcënimit.
Autoritetet polake thonë se nisma është e nevojshme për t’iu përgjigjur kërcënimeve moderne të sigurisë, përfshirë sulmet hibride, sulmet kibernetike dhe fushatat e dezinformimit.
Në kuadër të ligjit parashihet që institucionet shtetërore dhe strukturat e mbrojtjes të mund të ndërmarrin masa përgatitore përpara se situata të arrijë nivelin që do të kërkonte shpalljen formale të gjendjes së luftës.
Megjithatë, Ministria polake e Mbrojtjes ende nuk ka përcaktuar një datë se kur projektligji do t’i dorëzohet parlamentit për shqyrtim.
Nisma vjen në një kohë kur Polonia po forcon kapacitetet e saj ushtarake dhe planifikimin e mbrojtjes, duke e vendosur gatishmërinë ndaj kërcënimeve të ndryshme në qendër të politikës së saj të sigurisë. /Telegrafi/
