Video-loja Resident Evil 2, e publikuar nga Capcom në vitin 2019, tani mund të luhet edhe në mënyrën lokale bashkëpunuese (co-op), falë një modi të ri për kompjuterë, i cili i shton ribërjes së kësaj video-loje horror një personazh të dytë që mund të kontrollohet plotësisht nga lojtari.
Tashmë, adhuruesit e video-lojës mund të eksplorojnë së bashku qytetin Raccoon, me mundësinë e përdorimit të ekranit të përbashkët, ekranit të ndarë në dy pjesë, apo edhe të një shoqëruesi të kontrolluar nga inteligjenca artificiale.
Ribërja e Resident Evil 2, e konsideruar si një rikthim i suksesshëm i serisë, u publikua në vitin 2019 dhe u bë një nga lojërat më të rëndësishme të kompanisë Capcom, duke ndihmuar në vendosjen e themeleve për ribërjet moderne të kësaj serie.
Në lojën origjinale, personazhet kryesore janë Leon dhe Claire, por secili ka fushatën e vet, të projektuar për një lojtar të vetëm. Historitë e tyre ndërthuren në momente të caktuara, por loja nuk ofron zyrtarisht mënyrën bashkëpunuese.
Modi i ri, i quajtur Local Couch Co-op, është krijuar nga përdoruesi Shopcreeper01 dhe është publikuar në platformën Nexus Mods. Më herët, ai njihej me emrin HUNK’y Friend.
Modi e shndërron lojën në një përvojë të mirëfilltë për dy lojtarë, në vend që thjesht të shtojë një personazh shoqërues. Lojtari i dytë mund të kontrollojë personazhin HUNK ose disa personazhe të tjerë, secili me sistemin e vet të shënjestrimit, inventarin, armët, sendet që mund të mbledhë, ndërfaqen dhe elektrik dore.
Të dy lojtarët mund të sulmohen nga armiqtë, të shkëmbejnë furnizime dhe të ndihmojnë njëri-tjetrin të rikthehen në lojë. Nëse të dy personazhet mposhten, përfundon i gjithë sesioni i video-lojës.
Modi mbështet aktualisht ekranin e përbashkët dhe atë të ndarë, si dhe një mënyrë ku shoqëruesi kontrollohet nga inteligjenca artificiale, për ata që luajnë vetëm. Për funksionimin e tij nevojitet versioni i lojës për kompjuter në platformën Steam dhe mjeti REFramework.
Ai përfshin edhe një mënyrë eksperimentale të frymëzuar nga loja Pragmata, ku njëri lojtar kontrollon lëvizjen, ndërsa tjetri merret me shënjestrimin dhe gjuajtjen.
Megjithatë, shtimi i një lojtari të dytë ndryshon ndjeshëm përvojën e lojës. Një pjesë e madhe e tensionit në Resident Evil 2 krijohet nga fakti se Leon ose Claire duhet të përballen të vetëm me rreziqet, të kursejnë municionin, të shmangin zombitë dhe të përpiqen të mbijetojnë gjatë ndjekjeve nga zoti X.
Një lojtar shtesë mund t’i bëjë disa përballje më të lehta, por sjell edhe rreziqe të reja, pasi të dy personazhet mund të sulmohen dhe të shpenzojnë furnizimet e kufizuara.
Sipas krijuesit të modit, ideja fillestare ishte që bashkëshortja e tij të mund të merrte ndihmë gjatë lojërave që i dukeshin të frikshme. Projekti më pas u zhvillua në një mënyrë të plotë bashkëpunuese.
Mënyra co-op ka një histori të gjatë në serinë Resident Evil. Lojërat Outbreak lejonin deri në katër lojtarë të bashkëpunonin për të shpëtuar nga Raccoon City, ndërsa Resident Evil 5 e ndërtoi fushatën rreth bashkëpunimit mes Chris Redfield dhe Sheva Alomar.
Edhe Resident Evil 6 u orientua më shumë drejt aksionit bashkëpunues, ndërsa Revelations 2 kombinoi personazhe me aftësi të ndryshme për të plotësuar njëri-tjetrin.
Ajo që e bën modin e ri veçanërisht interesant është fakti se ai sjell bashkëpunimin në një lojë të projektuar kryesisht për horror dhe mbijetesë, ku izolimi dhe ndjenja e cenueshmërisë janë pjesë thelbësore e përvojës.
Ndërkohë, adhuruesit e serisë vazhdojnë të spekulojnë nëse Capcom do të realizojë një ribërje të Resident Evil 5. Një projekt i tillë nuk është shpallur zyrtarisht, por mënyra bashkëpunuese do të ishte një nga elementet kryesore për t’u marrë parasysh, pasi bashkëpunimi mes dy personazheve është thelbësor në atë video-lojë.
Për momentin, lojtarët në kompjuter nuk kanë nevojë të presin një projekt të ri nga Capcom për të provuar Resident Evil 2 në shoqërinë e një miku. Modin mund ta instalojnë dhe ta provojnë në versionin e lojës për PC. /Telegrafi/
