Papa Leo XIV është operuar me sukses, ndërsa i është hequr lobi i poshtëm i mushkërisë së djathtë, pasi masa e zbuluar në atë pjesë ishte kancerogjene, njoftoi Vatikani.
Papa 71-vjeçar iu nënshtrua ndërhyrjes kirurgjikale në spitalin Gemelli në Romë, pasi gjatë një kontrolli rutinë mjekësor iu zbulua një masë në mushkëri.
“Nyja që iu hoq Papës gjatë një operacioni kirurgjik 90-minutësh, të martën në spitalin Gemelli në Romë, ishte kancerogjene, çka bëri të domosdoshëm heqjen e lobit të poshtëm të mushkërisë së djathtë”, njoftoi Vatikani.
Operacioni “konfirmoi diagnozën e adenokarcinomës së mushkërive, ashtu siç dyshohej edhe në bazë të ekzaminimeve para operacionit”, raportojnë mediat.
Adenokarcinoma e mushkërive është lloji më i shpeshtë i kancerit të mushkërive te personat që nuk pinë duhan.
Ndërhyrja zgjati rreth 90 minuta dhe përfundoi me sukses, pa komplikime, njoftoi Vatikani.
Papa është zgjuar pas operacionit dhe po pushon në dhomën e tij të spitalit. Më herët, Vatikani kishte bërë të ditur se rikuperimi pritet të zgjasë një javë, ndërsa të gjitha aktivitetet e tij publike janë anuluar deri më 20 tetor.
Ky është problemi i parë serioz shëndetësor i Papës gjatë 17 muajve të pontifikatit të tij. /Telegrafi/
