Telefoni, rrjetet sociale dhe përmbajtja që shohim para gjumit mund ta mbajnë trurin aktiv pikërisht kur duhet të qetësohet
Zgjimi në mes të natës mund të jetë shumë frustrues, sidomos kur më pas nuk arrini të flini sërish. Shikimi i orës dhe llogaritja se sa kohë ka mbetur deri në alarm shpesh vetëm e shtojnë ankthin. Specialistët e gjumit paralajmërojnë se ekziston një zakon që e kontrollojnë ndër të parët te personat që kanë këtë problem.
Dr. Rupali Drewek thotë se përdorimi i ekraneve është një nga temat e para që diskuton me pacientët.
“Një nga pyetjet e para që bëj është: ‘A përdorni ekrane para gjumit?’”, thotë ajo për Parade. Sipas saj, ekranet nuk janë domosdoshmërisht shkaku i vetëm, por mund të jenë një pjesë e rëndësishme e problemit.
Edhe përmbajtja që shohim mund të ndikojë
Shkencëtarja dhe këshilltarja për gjumin, dr. Carleara Weiss, shpjegon se drita e pajisjeve elektronike mund të pengojë prodhimin e melatoninës dhe ta mbajë trurin të stimuluar.
Psikologia dr. Shelby Harris shton: “Nëse shfletoni rrjetet sociale, kontrolloni e-mailin e punës apo shikoni diçka stresuese ose emocionuese, truri mbetet aktiv pikërisht në kohën kur duhet të qetësohet.”
Në cilësinë e gjumit mund të ndikojnë edhe stresi, ankthi, kafeina, alkooli, orari i çrregullt, zhurma, si dhe disa gjendje apo çrregullime shëndetësore, si apnea obstruktive e gjumit.
Drewek thekson se zgjimet e herëpashershme gjatë natës janë normale. Ajo që ka më shumë rëndësi është sa shpesh ndodhin, sa zgjasin dhe sa ndikojnë në funksionimin e përditshëm.
Për të përmirësuar cilësinë e gjumit, rekomandohet një orar i rregullt dhe një rutinë qetësuese para gjumit, si dhe shmangia e telefonit celular pas zgjimit gjatë natës.
“Sa më shumë të përpiqeni me forcë të flini, aq më i paarritshëm bëhet gjumi”, paralajmëron Harris.
Nëse problemet vazhdojnë ose shoqërohen me gërhitje, ndërprerje të frymëmarrjes gjatë gjumit apo përgjumje të theksuar gjatë ditës, këshillohet konsultimi me mjekun. /Telegrafi/
