Protesta shpërthyen në Austin të Teksasit pasi një agjent i Shërbimit amerikan të Emigracionit dhe Doganave (ICE) qëlloi dhe plagosi një shofer venezuelas të DoorDash gjatë një operacioni të dielën.
Rrethanat e sakta të incidentit ende nuk janë bërë të qarta, ndërsa autoritetet lokale kërkojnë një hetim të pavarur, transmeton Telegrafi.
I plagosuri është Wilber Rafael Garces Perez, 28 vjeç, shtetas venezuelas që punonte si shpërndarës për DoorDash. Ai u qëllua në pjesën e sipërme të trupit dhe u dërgua në spital, sipas avokates së tij.
Departamenti amerikan i Sigurisë Kombëtare (DHS) konfirmoi se po hetonte të shtënat ndaj një personi në Austin, duke deklaruar se ai kishte hyrë ilegalisht në SHBA.
Megjithatë, ende nuk dihet se çfarë e çoi konkretisht në përdorimin e armës dhe nëse pati ndonjë përplasje para të shtënave, transmeton Telegrafi.
Avokatja Kate Lincoln-Goldfinch tha për mediat amerikane se Garces Perez telefonoi bashkëshorten nga spitali, ndërsa “bërtiste nga dhimbjet”. Sipas saj, ai ndodhej në paraburgim të ICE.
Pas incidentit, dhjetëra protestues u mblodhën në Austin, disa prej tyre duke mbajtur flamuj të Meksikës dhe Guatemalës dhe pankarta që kërkonin largimin e ICE nga qyteti.
Pamjet televizive treguan protestuesit përballë një Toyota Corolla me dëmtime në derën e pasagjerit, ndërsa agjentë të ICE ndodheshin pranë automjetit.
Kryebashkiaku i Austin, Kirk Watson, tha se banorët kanë të drejtë të dinë se çfarë ka ndodhur dhe të ndihen të sigurt në qytetin e tyre.
“Ata duhet ta dinë të vërtetën”, deklaroi Watson, duke shtuar se qyteti do të përfshihet edhe në hetimin e incidentit.
Sipas tij, aktivitetet e ICE në Austin janë shtuar ndjeshëm gjatë javëve të fundit.
Incidenti vjen në një periudhë kur administrata e presidentit Donald Trump ka intensifikuar arrestimet dhe operacionet kundër emigracionit, duke shkaktuar protesta dhe përplasje në disa qytete amerikane.
Administrata e ka mbrojtur këtë politikë, duke argumentuar se kontrollet më të ashpra janë të nevojshme për sigurinë publike, mbrojtjen e kufirit dhe zbatimin e politikës së deportimeve masive të premtuar gjatë fushatës.
Ndërkohë, agjencia ICE është përballur me kritika dhe hetime pas disa incidenteve me të shtëna, përfshirë vdekjen e një banori të Houstonit, Lorenzo Salgado Araujo, i cili u qëllua gjatë një ndalimi nga agjentët e ICE.
Sipas DHS-së, Salgado Araujo nuk ishte objekt i një hetimi nga ICE, por u qëllua gjatë një ndalimi rrugor.
Kongresmeni demokrat nga Teksasi, Greg Casar, kërkoi një hetim të plotë dhe të menjëhershëm të pavarur për incidentin në Austin, si dhe publikimin e pamjeve nga kamerat e trupit të agjentëve.
Ai kërkoi gjithashtu që çdo agjent i ICE që ka shkelur ligjin të mbajë përgjegjësi.
Aktivistët akuzojnë administratën se ka shkelur të drejtat procedurale gjatë fushatës së saj të ashpër kundër emigracionit.
Demokratët kanë kërkuar reforma në ICE, përfshirë detyrimin që agjentët të mbajnë kamera në trup dhe të mos fshehin fytyrën gjatë operacioneve.
Në fillim të këtij muaji, Departamenti amerikan i Drejtësisë akuzoi një agjent të ICE-së për dhënie informacioni të rremë lidhur me të shtënat ndaj një emigranti venezuelas në Minesota.
Rasti përbën një nga rastet e rralla të kohëve të fundit kur një agjent federal është akuzuar nga vetë Departamenti i Drejtësisë për shkelje të ligjit gjatë detyrës.
Incidenti në Austin pritet të mbetet nën hetim ndërsa autoritetet përpiqen të përcaktojnë saktësisht se çfarë ndodhi para të shtënave dhe nëse përdorimi i armës ishte i justifikuar. /Telegrafi/
