Polemikat pas fitores së “Los Colchoneros” në derbi vazhdojnë, me klubin madrilen që ka reaguar përmes postimeve ironike ndaj rivalit të qytetit.
Atletico Madridi nuk ka qëndruar i heshtur pas fitores 2-1 ndaj Real Madridit në “Metropolitano”, duke përdorur rrjetet sociale për t’iu kundërpërgjigjur qëndrimit të rivalit pas derbit.
Klubi “rojiblanco” reagoi rreth 24 orë pas triumfit, me disa postime ironike që lidhen me ankesat për gjykimin e bëra nga trajneri i Real Madridit, Jose Mourinho, në konferencën për shtyp pas ndeshjes.
Postimet e Atletico Madridit kundër Real Madridit
Departamenti i komunikimit i klubit madrilen publikoi fillimisht një mesazh me sloganin “Stop presionit ndaj gjyqtarëve tani”, të shoqëruar me një fotografi të Mourinhos duke mbajtur në duar disa fletë me pamje të rasteve të Lee Kang-In dhe Cristian Romero.
Përmes këtij postimi, Atletico ironizoi reagimin e Real Madridit ndaj vendimeve të gjyqtarëve dhe asaj që klubi “rojiblanco” e konsideron si presion të shtuar ndaj sektorit të arbitrimit.
Në një postim të dytë, Atletico iu referua edhe pushimit të kombëtareve prej tri javësh, duke ironizuar se “makineria” e Real Madridit ka nisur punën shumë herët këtë sezon.
Këto reagime vijnë në vazhdën e rasteve të mëparshme kur Atletico ka përdorur kanalet e veta zyrtare për t’iu përgjigjur në mënyrë ironike deklaratave apo ankesave të rivalëve.
Pavarësisht jehonës së madhe të këtyre postimeve, Real Madridi nuk ka dhënë ndonjë përgjigje zyrtare përmes kanaleve të tij.
Klubi madrilen ka zgjedhur të mos përfshihet në një përplasje publike në rrjetet sociale, duke qëndruar te qëndrimet e shprehura nga Mourinho në konferencën për shtyp pas derbit.
Ndërkohë, trajneri i Atletico Madridit, Diego Simeone, kishte bërë thirrje për respekt institucional pas ndeshjes, duke theksuar se nuk duhet të tejkalohet kufiri i respektit, pavarësisht emrit apo famës së personave të përfshirë.
Fitorja 2-1 e Atletico Madridit ka lënë pas vetes edhe një përplasje të re mes dy klubeve të Madridit, këtë herë të zhvendosur në rrjetet sociale, ndërsa debati për vendimet e arbitrimit vazhdon të jetë në qendër të vëmendjes. /Telegrafi/
