Ukraina ka ofruar një pasqyrë të taktikave të Rusisë në fushën e betejës dhe mënyrës se si ato kanë ndryshuar gjatë vitit të fundit.
Një zëdhënës i Grupit të Përbashkët të Forcave deklaroi se trupat ruse po sulmojnë në grupe prej vetëm pak ushtarësh, e ndonjëherë edhe individualisht.
Viktor Trehubov tha se ata që arrijnë ta kalojnë “zonën e vdekjes” fshihen dhe presin që të tjerët t’i ndjekin, shkruajnë mediat e huaja, përcjell Telegrafi.
Kjo u mundëson atyre të fillojnë planifikimin e sulmeve të mëtejshme në grupe më të organizuara, tha ai për agjencinë ukrainase të lajmeve Ukrinform.
Sipas Trehubov-it, Rusia ka ndaluar kryesisht përdorimin e tankeve apo pajisjeve të tjera të rënda për operacionet sulmuese.
Ai tha se dronët kanë marrë përsipër shumë nga rolet që më parë kryheshin nga tanket, si për njërën ashtu edhe për palën tjetër.
Këto detaje vijnë pasi presidenti Volodymyr Zelensky tha se forcat ruse kanë lëshuar më shumë se 2.000 dronë sulmues, 1.700 bomba ajrore të drejtuara dhe 19 raketa të llojeve të ndryshme kundër Ukrainës gjatë javës së kaluar.
Zelensky vuri në dukje se shumica e mjeteve ajrore pa pilot (UAV) të përdorura nga Rusia në këtë valë sulmesh javore ishin variante me motorë turbojet, të cilat lëvizin me shpejtësi më të lartë dhe paraqesin sfida më të mëdha për sistemet tokësore të mbrojtjes ajrore. /Telegrafi/
