Leonora Jakupi ka publikuar në Instagram një fotografi nga protesta e sotme në sheshin “Skënderbeu” në Prishtinë, ku shfaqet së bashku me ish-banorin e Big Brother VIP Kosova 4, Klodian Mihajn.
Jakupi, e cila ishte opinioniste në edicionin e katërt të këtij formati, është parë sërish në mesin e protestuesve.
Protesta po mbahet në mbështetje të ish-krerëve të Ushtrisë Çlirimtare të Kosovës, pas aktgjykimit të Dhomave të Specializuara në Hagë.
Më 16 shtator, Hashim Thaçi u dënua me 25 vjet burgim, Jakup Krasniqi me 25 vjet, Kadri Veseli me 18 vjet dhe Rexhep Selimi me 13 vjet, gjithsej 81 vjet burgim.
Tubimi është organizuar nga platforma “Liria ka Emër”, ndërsa protestat kundër vendimit kanë vazhduar prej ditësh në Prishtinë.
Organizatorët kanë bërë thirrje për pjesëmarrje të gjerë qytetare për të shprehur kundërshtimin ndaj aktgjykimit.
Në këtë kontekst, edhe prania e Jakupit është vënë në pah, pasi këngëtarja ka marrë pjesë edhe në protestat e mëparshme dhe ka shprehur publikisht mbështetjen e saj për ish-krerët e UÇK-së.
Pak para shpalljes së aktgjykimit, ajo publikoi edhe këngën “Po vjen komandanti”. /Telegrafi/
