Komisioni Evropian dhe Ukraina kanë rënë dakord për mënyrat e mbulimit të nevojave buxhetore të vendit deri në fund të vitit 2026.
Kjo bëhet e ditur në një deklaratë të përbashkët të Komisionit Evropian dhe Ukrainës, sipas raportimit të “Ukrinform”, përcjell Telegrafi.
“Sot, përmes përpjekjeve të përbashkëta të koordinuara, kemi identifikuar mjetet për të mbuluar nevojat buxhetore dhe të mbrojtjes së Ukrainës për vitin 2026”, thanë palët.
Ato gjithashtu rikonfirmuan hapat e nevojshëm për të siguruar disbursimin e tyre në kohë.
Për vitin 2027, palët ranë dakord të ecin shpejt me alokimin e 45 miliardë eurove në kuadër të Huasë për Mbështetjen e Ukrainës, në varësi të përmbushjes së kushteve të vendosura.
“Ne gjithashtu do të fillojmë punën për identifikimin e nevojave shtesë buxhetore dhe të mbrojtjes”, thuhej në deklaratën e përbashkët.
Të gjitha palët ranë dakord se edhe partnerët e tjerë duhet të përmbushin angazhimet e tyre financiare dhe të intensifikojnë përpjekjet, duke pasur parasysh sfidat e mëdha me të cilat përballet Ukraina.
Palët ranë dakord gjithashtu sot që të takohen çdo muaj për të koordinuar përpjekjet e përbashkëta për mbulimin e nevojave financiare të Ukrainës.
“Dialogu ynë me Komisionin Evropian ka dhënë rezultate të mira në adresimin e nevojave financiare dhe të mbrojtjes së Ukrainës për vitet 2026 dhe 2027. Kemi rënë dakord për formatin, afatet kohore dhe hapat e nevojshëm për të siguruar mbulimin e plotë. Në vijim, ne do ta koordinojmë këtë punë dhe do t’i harmonizojmë veprimet tona çdo muaj, duke siguruar koordinim të vazhdueshëm”, shkroi në Facebook presidenti ukrainas Volodymyr Zelensky.
Ai shprehu mirënjohjen për të gjithë partnerët evropianë dhe tha se aktualisht po përgatiten vendime shtesë për të forcuar Ukrainën. /Telegrafi/
