Ndeshja mes Kosovës dhe Irlandës nuk ishte vetëm një 90-minutësh futbolli në “Fadil Vokrri”. Që nga momentet para fillimit e deri te fishkëllima e fundit, stadiumi i Prishtinës ishte i mbushur me emocione, mesazhe dhe momente që nuk u vunë të gjitha në qendër të vëmendjes gjatë transmetimit.
Koreografia e “Dardanëve”, atmosfera në tribuna dhe prania e figurave të njohura i dhanë një tjetër dimension mbrëmjes.
Në mesin e mysafirëve ishte edhe kryeministri Albin Kurti, i cili mbërriti në stadium pasi ndeshja kishte nisur, ndërsa në tribunën e të ftuarve ishte edhe presidenti i FSHF-së, Armando Duka.
Nga ato që ndodhën para ndeshjes, te momentet në tribuna dhe deri te festa pas golit, Telegrafi ua janë 10 prapaskena që ndoshta nuk i keni parë gjatë transmetimit të ndeshjes Kosovë–Irlandë.
1. “Fadil Vokrri” u mbush shumë para startit – atmosfera paralajmëroi një natë të veçantë
Që para fillimit të ndeshjes, “Fadil Vokrri” kishte marrë pamjen e një stadiumi që priste një mbrëmje të madhe. Tifozët e Kosovës dhe ata të Irlandës nisën të mbushnin tribunat shumë herët, ndërsa atmosfera sa vinte e bëhej më e zjarrtë. Ishte edhe ndeshja e parë e Kosovës në edicionin e ri të Ligës së Kombeve dhe pritshmëritë ishin të mëdha pas një periudhe me shumë mungesa dhe ndryshime në përfaqësuese.
2. Dardanët me mesazh të fortë – koreografia që tërhoqi vëmendjen
Pak para nisjes së ndeshjes, “Dardanët” shpalosën koreografinë e tyre, duke e kthyer tribunën në një prej pikave më të komentuara të mbrëmjes. Mesazhi lidhej me çështjen e ish-pjesëtarëve dhe ish-krerëve të UÇK-së të dënuar nga Dhomat e Specializuara në Hagë. Në tribunë u shfaq mesazhi “Unitet. Çlirim. Krenari”, duke formuar edhe inicialet UÇK.
3. Kurti nuk ishte aty që në fillim – kryeministri mbërriti me vonesë
Në tribunën VIP u vu re edhe prania e kryeministrit të Kosovës, Albin Kurti. Ai nuk ishte në stadium që në momentet e para të ndeshjes, por mbërriti më vonë dhe ndoqi pjesën e mbetur nga afër.
4. Edhe Armando Duka në “Fadil Vokrri” – fotografia që bashkoi Kosovën dhe Shqipërinë
Një tjetër mysafir i veçantë ishte presidenti i FSHF-së dhe zëvendëspresidenti i UEFA-s, Armando Duka. Edhe ai u shfaq në stadium gjatë ndeshjes dhe u fotografua së bashku me Albin Kurtin dhe presidentin e FFK-së, Agim Ademi.
Duka publikoi më pas fotografinë dhe uroi “Dardanët” për ndeshjen.
5. Në fushë një fytyrë e re – debutimi i shumëpritur i Erblin Osmanit
Në mesin e shumë zhvillimeve të mbrëmjes ishte edhe debutimi i Erblin Osmanit me fanellën e Kosovës. Talenti i Bayern Munichut, vetëm 17-vjeçar, ishte grumbulluar për herë të parë me ekipin A pasi më parë kishte luajtur për grupmoshat e Gjermanisë.
Osmani hyri në lojë në minutën e 87-të, duke bërë kështu debutimin e tij me përfaqësuesen seniore të Kosovës.
6. Kosova sulmonte, por goli nuk po vinte
Në fushë, “Dardanët” kishin nisur me ritëm dhe krijuan disa mundësi të mira, ndërsa Irlanda mbijetoi gjatë pjesës së parë. Vedat Muriqi pati mundësi për të shënuar, ndërsa një nga momentet më të afërta erdhi kur goditja e tij me kokë u ndal nga një ndërhyrje e portierit irlandez.
Edhe pas pushimit, ndeshja mbeti e hapur dhe tensioni në stadium rritej minutë pas minute. Irlanda kishte shumë pak për të treguar në aspektin ofensiv dhe, sipas raportimeve pas ndeshjes, kishte vetëm një goditje në kuadrat.
7. Minuta e 83-të – Muriqi shpërthen dhe “Fadil Vokrri” çmendet
Dhe erdhi momenti që të gjithë po e prisnin. Në minutën e 83-të, pas një aksioni të Kosovës dhe goditjes së Ermal Krasniqit që u përplas në traversë, Vedat Muriqi ishte aty ku duhej. Kapiteni u hodh mbi top dhe me kokë e dërgoi në rrjetë për 1:0. “Fadil Vokrri” shpërtheu.
8. Festimi i Muriqit nuk ishte i zakonshëm – fanella me mesazhin për çlirimtarët
Menjëherë pas golit, Muriqi dhe bashkëlojtarët nxorën një fanellë të bardhë me mesazhin “Drejtësi për Çlirimtarët”. Ishte një moment që i dha golit një dimension përtej futbollit dhe u bë një prej pamjeve kryesore të gjithë mbrëmjes.
Muriqi e ngriti fanellën para tifozëve, ndërsa mesazhi lidhej me dënimet e fundit të ish-krerëve të UÇK-së nga Dhomat e Specializuara në Hagë.
9. Pas golit, Kosova kërkoi edhe të dytin – Irlanda u shpërbë
Në vend që të tërhiqej, Kosova vazhdoi të sulmonte. Vetëm pak çaste pas golit, Ermal Krasniqi pati një tjetër rast të artë për të dyfishuar epërsinë, ndërsa më pas edhe Veldin Hoxha ishte pranë golit.
Mërgim Vojvoda provoi gjithashtu, por portieri irlandez e ndali tentativën. Në tribuna tashmë nuk kishte më qetësi – çdo aksion i Kosovës shoqërohej me shpërthime të tifozëve.
10. Foda vlerësoi mbrojtjen pas fitores – largimi i Rrahmanit nuk lë shenjë
Kur gjyqtari dha fundin e ndeshjes, Kosova kishte marrë fitoren 1-0 dhe tri pikët e para në Ligën e Kombeve. Pas përfundimit të ndeshjes, përzgjedhësi Franco Foda u shpreh i kënaqur me paraqitjen e Kosovës, duke veçuar sidomos organizimin në mbrojtje.
“Sot më pëlqeu reparti defensiv. Nuk krijuan asnjë mundësi irlandezët”.
Ky ishte edhe një mesazh, pasi mbrojtja me Lumbardh Dellovë, Ilir Krasniqin dhe Albian Hajdarin, bën që të mos shihet mungesa e ish kapitenit, Amir Rrahmani.
Fjalët e Fodës erdhën menjëherë pas një ndeshjeje ku Kosova arriti ta mbajë portën të paprekur dhe në fund të marrë tri pikët falë golit të Vedat Muriqit. /Telegrafi/
