Konjufca në New York, ministrit holandez ia ngre çështjen e aktgjykimit ndaj ish-krerëve të UÇK-së

Ministri i Punëve të Jashtme dhe Diasporës, Glauk Konjufca, ka bërë të ditur se gjatë takimit me ministrin e Jashtëm të Holandës, Tom Berendsen, në New York, ka ngritur çështjen e aktgjykimit të shkallës së parë ndaj ish-krerëve të Ushtrisë Çlirimtare të Kosovës.

Konjufca po qëndron në New York në kuadër të Javës së Nivelit të Lartë të sesionit të 81-të të Asamblesë së Përgjithshme të Kombeve të Bashkuara, ku ka zhvilluar një sërë takimesh me përfaqësues ndërkombëtarë.

Ai tha se në takimin me kryediplomatin holandez ka diskutuar për aktgjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

“I ngrita çështjen e aktgjykimit të padrejtë të shkallës së parë të Dhomave të Specializuara ndaj ish-krerëve të UÇK-së, Hashim Thaçit, Kadri Veselit, Rexhep Selimit dhe Jakup Krasniqit”, deklaroi Konjufca.

Lexo edhe nga Nacionale

Një ditë pas aktgjykimit në Hagë, institucionet në Kosovë e Shqipëri në lëvizje Një ditë pas aktgjykimit të Dhomave të Specializuara të Kosovës në Hagë ndaj ish-drejtuesve të Ushtrisë Çlirimtare të...

Sipas tij, qëndrimi i Kosovës është se aktgjykimi “shtrembëron të vërtetën historike, përbën një padrejtësi serioze dhe duhet të korrigjohet në shkallën e Apelit”.

Aktgjykimi i shkallës së parë ndaj katër ish-krerëve të UÇK-së u shpall më 16 shtator në Hagë.

Gjatë qëndrimit në New York, Konjufca, së bashku me kryeministrin Albin Kurti, zhvilloi takim edhe me kryeministrin kroat Andrej Plenković dhe ministrin e Punëve të Jashtme dhe Çështjeve Evropiane të Kroacisë, Gordan Grlić Radman.

Konjufca e cilësoi Kroacinë si një prej partnerëve më të afërt të Kosovës në rajon, duke theksuar bashkëpunimin në fushën e sigurisë dhe mbrojtjes, si dhe perspektivën euroatlantike të Kosovës.

Kryediplomati kosovar u takua gjithashtu me zëvendëskryeministrin dhe ministrin e Jashtëm të Emirateve të Bashkuara Arabe, Sheikh Abdullah bin Zayed Al Nahyan. Sipas Konjufcës, në takim është diskutuar për rritjen e investimeve dhe mundësitë për zgjerimin e bashkëpunimit ekonomik ndërmjet dy vendeve.

Takime pati edhe me ministrin e Jashtëm të Xhibutit, Abdoulkader Houssein Omar, si dhe me kryeministrin e Ruandës, Justin Nsengiyumva, dhe ministrin e Jashtëm të këtij vendi, Olivier Nduhungirehe.

“Vazhdojmë angazhimin për forcimin e partneriteteve të Kosovës dhe avancimin e interesave të vendit tonë në arenën ndërkombëtare”, tha Konjufca.

Konjufca aktualisht mban postin e zëvendëskryeministrit të parë dhe ministrit të Punëve të Jashtme dhe Diasporës. /Telegrafi/