Të paktën një person ka humbur jetën dhe 25 të tjerë rezultojnë të zhdukur pasi një varkë që transportonte emigrantë u fundos në det, pranë ishullit Gavdos, në jug të Kretës.
Roja Bregdetare greke njoftoi se ka arritur të shpëtojë 51 persona.
Operacioni i kërkim-shpëtimit u zhvillua nën koordinimin e Qendrës së Përbashkët të Koordinimit të Kërkim-Shpëtimit (JRCC), pasi autoritetet morën një alarm për një varkë me emigrantë në vështirësi.
Në operacion u përfshinë anije patrulluese, një helikopter dhe një dron, ndërsa në kërkim morën pjesë edhe anije tregtare.
Operacioni u mbështet gjithashtu nga Frontex, agjencia e Bashkimit Evropian për mbrojtjen e kufijve.
Erërat e forta raportohet se po e vështirësojnë ndjeshëm operacionin e kërkimit.
Operacioni i kërkim-shpëtimit pritet të vijojë, ndërsa autoritetet po kontrollojnë një zonë të gjerë detare me shpresën për të gjetur të mbijetuar ose gjurmë që mund të ndihmojnë në lokalizimin e personave të zhdukur.
