Real Madridi ka reaguar ashpër ndaj presidentit të La Ligës, Javier Tebas, duke e akuzuar atë se po përdor pozitën e tij institucionale për të sulmuar dhe denigruar vazhdimisht klubin madrilen.
Në një komunikatë zyrtare, klubi spanjoll e ka cilësuar si “të patolerueshme” sjelljen e Tebasit dhe ka vënë në pikëpyetje mënyrën se si ai po e ushtron detyrën e tij.
“Klubi ynë e konsideron të patolerueshme që presidenti i La Ligës të përdorë pozitën e tij institucionale për të denigruar dhe sulmuar vazhdimisht Real Madridin, siç bën në secilën prej deklaratave të tij publike”.
Real Madridi ka kritikuar gjithashtu faktin se personi përgjegjës për përfaqësimin dhe mbrojtjen e interesave të të gjitha klubeve të La Ligës, sipas tyre, është vazhdimisht i përqendruar te klubi madrilen.
“Është thellësisht shqetësuese që personi përgjegjës për përfaqësimin dhe mbrojtjen e interesave të të gjitha klubeve të La Ligës mbetet i fiksuar në mënyrë obsesive pas Real Madridit, duke e bërë klubin tonë një objektiv të vazhdueshëm të sulmeve të tij publike”.
“Ndërhyrja e tij e fundit është veçanërisht serioze dhe e pakuptueshme – e padenjë për një administrator të përgjegjshëm – pasi përfshin komentimin e një artikulli të një gazetari të pavarur në një medium digjital. Megjithatë, ai reagoi kundër klubit tonë duke marrë guximin të kritikojë strategjinë tonë sportive, një veprim krejtësisht absurd dhe i papërgjegjshëm”.
Real Madridi ka shkuar edhe më tej, duke akuzuar Tebasin se po dëmton imazhin e futbollit spanjoll.
“Është befasuese që presidenti i La Ligës i kushton kohën dhe kanalet e tij personale për ta diskredituar publikisht Real Madridin, në vend që të përdorë pozitën e tij për të krijuar besim te institucionet që duhet të garantojnë paanshmërinë e garës”.
“Duke pasur parasysh këtë sjellje të vazhdueshme dhe të papërshtatshme, besojmë se futbolli profesionist në Spanjë ka urgjentisht nevojë për një lider të aftë për ta menaxhuar garën dhe për të shfrytëzuar potencialin e saj të plotë, duke respektuar detyrën themelore të neutralitetit”.
“Presidenti i La Ligës nuk është pronari i garës, por një administrator që u shërben klubeve që e përbëjnë atë dhe që ia kanë besuar atij udhëheqjen. Ne, klubet, kemi nevojë për dikë që do t’i shërbejë sinqerisht këtij misioni”, thuhet në komunikatë./Telegrafi/
