Chevrolet Corvette ZR1X po tërheq vëmendje të madhe në treg, pasi një model i vitit 2027 në ankand ka kaluar tashmë shifrën prej 400 mijë dollarësh, rreth 340 mijë euro.
Makina kishte një çmim fillestar prej 209.595 dollarësh, ose rreth 178 mijë euro, ndërsa ky ekzemplar është konfiguruar me opsione që e çojnë vlerën e tij në 296.100 dollarë, rreth 252 mijë euro.
Corvette ZR1X fuqizohet nga një motor 5.5-litërsh V8 me dy turbo, i kombinuar me një motor elektrik, duke prodhuar gjithsej 1.250 kuaj fuqi.
Falë sistemit me të gjitha rrotat, ajo përshpejton nga 0 në 100 kmh për vetëm 1.68 sekonda dhe përshkon çerek miljen për 8.67 sekonda.
Ky model është veçanërisht i kërkuar pasi nuk është regjistruar apo shitur më parë te një pronar privat dhe ruan garancinë e plotë të fabrikës.
Nëse ofertat vazhdojnë të rriten, Corvette ZR1X mund të arrijë një çmim prej afro 425 mijë eurosh, duke hyrë në territorin e supermakinave shumë më të shtrenjta. /Telegrafi/
