Putin tregon se sa i kanë kushtuar sulmet ukrainase, Rusisë – flet edhe për përdorimin e armëve të shkatërrimit në masë

Presidenti rus Vladimir Putin ka pranuar se sulmet me dronë të Ukrainës ndaj rafinerive dhe infrastrukturës energjetike ruse kanë shkaktuar dëme të konsiderueshme, duke vlerësuar se ato i kanë kushtuar Rusisë rreth 1% të Prodhimit të Brendshëm Bruto.

Duke folur në Klubin e Diskutimeve Valdai në Moskë, Putin tha se Ukraina “ka arritur disa rezultate” me fushatën e saj të sulmeve ndaj infrastrukturës ruse, shkruajnë mediat e huaja, përcjell Telegrafi.

“Në të vërtetë, ata arritën të sigurojnë disa rezultate, sipas vlerësimeve tona, dhe na morën rreth 1% të PBB-së”, deklaroi Putin.

Megjithatë, presidenti rus pretendoi se Ukraina kishte goditur fillimisht infrastrukturën civile dhe se Rusia më pas ishte përgjigjur.

Lexo edhe nga Bota

Dy të vdekur, disa të tjerë të lënduar – pasi autobusi turistik doli nga rruga dhe u përmbys në Gjermani Dy persona raportohet të kenë gjetur vdekjen pas një aksidenti në autostradën 96, pranë Buchloe-s në rajonin Ostallgäu,...

Këto pretendime janë kundërshtuar gjerësisht, ndërsa lufta ka vazhduar me sulme ruse ndaj qyteteve dhe infrastrukturës civile në Ukrainë.

Putin përsëriti gjithashtu qëndrimin e tij se Rusia nuk e nisi luftën, duke pretenduar se Moska ishte “e detyruar” të reagonte ndaj asaj që ai e përshkroi si agresion.

“Jam i sigurt se Rusia u vendos qëllimisht në një situatë ku thjesht u detyrua t’i përgjigjej këtij agresioni të dukshëm; u detyrua të mbrohej, duke marrë armët”, tha ai.

Gjatë fjalimit, Putin paralajmëroi gjithashtu se përdorimi i armëve të shkatërrimit në masë nuk mund të përjashtohet, duke bërë thirrje për shmangien e një përshkallëzimi të mëtejshëm.

“A mund të jemi të sigurt se këto armë nuk do të përdoren kurrë? Fatkeqësisht, nuk mund të jemi të sigurt”, deklaroi presidenti rus.

Sipas tij, përshkallëzimi i konflikteve po e çon botën “në skaj të humnerës”.

Putin tha gjithashtu se konfliktet ndërkombëtare ka të ngjarë të vazhdojnë edhe në të ardhmen.

“Do të doja të isha gabim në vlerësimin tim, por duket se tendencat e qëndrueshme të ditëve të sotme, për fat të keq, janë të tilla”, u shpreh ai.

Në pjesën e tij për zhvillimet globale, Putin argumentoi se dobësimi i dominimit perëndimor do të çojë, sipas tij, drejt një rendi të ri ndërkombëtar.

Në të njëjtën kohë, ai paralajmëroi se rruga drejt këtij rendi të ri do të shoqërohet me rreziqe.

“Në rrugën drejt një rendi të tillë botëror, shumë rreziqe na presin – për shtetet, komunitetet dhe çdo person individualisht; kjo është e pashmangshme”, deklaroi presidenti rus. /Telegrafi/