Erling Haaland është përfshirë në historinë virale të tifozit të Manchester United, Frank Ilett, i cili prej një kohe të gjatë nuk i ka prerë flokët për shkak të një basti të vendosur me veten.
Ilett, i njohur në rrjetet sociale përmes kanalit “The United Strand”, kishte premtuar në tetor të vitit 2024 se nuk do t’i priste flokët derisa Manchester United të fitonte pesë ndeshje radhazi. Në shkurt, ai ishte shumë pranë realizimit të premtimit, pasi “Djajtë e Kuq” mposhtën Manchester Cityn, Arsenalin, Fulhamin dhe Tottenhamin.
Megjithatë, në ndeshjen e pestë, United u ndal në një barazim 1-1 ndaj West Hamit. Kështu, Ilett duhej të vazhdonte të mbante flokët e gjatë, ndërsa reagimi i tij pas ndeshjes u ndoq drejtpërdrejt nga afro 300 mijë persona në Kick.
Historia e tij është rikthyer në vëmendje pas një tjetër zhvillimi interesant. Manchester City ka nisur sezonin në mënyrë perfekte, duke fituar pesë ndeshjet e para në Ligën Premier, ndërsa një teori e tifozëve në rrjetet sociale lidhi edhe prerjen e flokëve të Haalandit me këtë seri rezultatesh.
Sipas kësaj teorie, norvegjezi mund ta ketë zgjedhur me qëllim momentin për të ndryshuar stilin e flokëve, pikërisht pas fitores së pestë të Man Cityt në kampionat. Kjo bëri që edhe Ilett të përfshihej në diskutim.
“Unë personalisht nuk mendoj se ka të bëjë fare me të. Nëse do të kishte, ai do t’i kishte prerë flokët pas fitores së pestë kundër Unitedit, jo pas të shtatës kundër Sunderlandit”, shkroi Ilett në rrjetet sociale.
Përgjigjja e Haalandit ishte e shkurtër dhe me dozën e duhur të ironisë. Sulmuesi i Manchester Cityt iu përgjigj tifozit të United me vetëm disa fjalë: “Priti flokët, shoku”.
Replika e norvegjezit menjëherë tërhoqi vëmendje në rrjetet sociale, duke i dhënë edhe një tjetër kapitull historisë së tifozit që është bërë viral pikërisht për shkak të flokëve të tij.
Edhe legjenda e Manchester United, Wayne Rooney, kishte komentuar më herët këtë histori. Në një episod të podcastit “No Tippy Tappy Football”, Rooney ishte shprehur i irrituar nga vëmendja që kishte marrë sfida e Ilett, duke argumentuar se fokusi duhej të ishte te skuadra dhe jo te një tifoz që po priste një prerje flokësh.
“Po flasim për Michael Carrick dhe Unitedin që po përpiqen të fitojnë ndeshjen e tyre të pestë radhazi dhe e gjithë historia ka të bëjë me një djalë që ka nevojë për një prerje flokësh”, kishte thënë Rooney.
Për Ilettin, megjithatë, saga vazhdon. Dhe tani, pas komentit të Haalandit, presioni për të shkuar te parukierja duket se është bërë edhe më i madh. /Telegrafi/
