Pas hetimit, një prokuror publik nga Prokuroria Themelore Publike për Ndjekjen e Krimit të Organizuar dhe Korrupsionit ngriti një aktakuzë në Gjykatën Themelore Penale në Shkup kundër një personi për veprën penale “rrezikim të personave nën mbrojtje ndërkombëtare”.
Siç njoftojnë nga PTHP, i dyshuari akuzohet se ka krijuar një rrezik të konsiderueshëm për jetën dhe trupin e personave nën mbrojtje ndërkombëtare duke ndezur një zjarr më 15 qershor të këtij viti, rreth orës 12:05, para Ambasadës së Republikës së Bullgarisë në Shkup.
“Sipas veprimeve të përshkruara në aktakuzë, i pandehuri më parë kishte mbushur një shishe plastike me benzinë në një pikë karburanti në afërsi të Ambasadës dhe ishte drejtuar drejt objektit. Kur iu afrua automjeteve të parkuara të përdorura nga atasheu ushtarak i Republikës së Bullgarisë dhe punonjës të tjerë të Ambasadës, i spërkati ato me benzinë dhe i vuri flakën, pas së cilës u largua menjëherë nga vendi i ngjarjes”, thuhet në deklaratë.
Së bashku me aktakuzën, prokurori publik i paraqiti gjykatës një propozim për zgjatjen e masës së paraburgimit të përcaktuar më parë, duke vlerësuar se arsyet për të cilat masa është përcaktuar dhe zgjatur ende ekzistojnë.
Sipas Prokurorisë, rrethanat tregojnë rrezik që i dyshuari të bëhet i paarritshëm për organet e zbatimit të ligjit dhe kështu të pengojë zhvillimin e procedurës penale. Gjatë propozimit të masës, është marrë parasysh edhe lartësia e dënimit të përcaktuar për veprën penale, si dhe natyra e veprimeve që i ngarkohen, të cilat synojnë sigurinë dhe të drejtat e personave nën mbrojtje ndërkombëtare, përfshirë përfaqësuesit diplomatikë.
Në përputhje me dispozitat e Kodit Penal, vepra penale që i ngarkohet të pandehurit dënohet me burgim prej të paktën një viti./Telegrafi/
