Rodri ka shpjeguar arsyet pse, edhe pas 30-vjetorit të tij, vazhdon të qëndrojë larg rrjeteve sociale, duke theksuar se studimi dhe distancimi nga bota virtuale e kanë ndihmuar të ruajë perspektivën gjatë karrierës së tij.
Pavarësisht se te Barcelona është i rrethuar nga bashkëlojtarë më të rinj, mesfushori spanjoll nuk ka ndërmend të ndryshojë qëndrimin e tij ndaj rrjeteve sociale.
“Jo, nuk do ta ndryshoj tani që jam 30 vjeç. Për më tepër, sa më shumë kalon koha, aq më i bindur jam për këtë vendim. Është një mjet për të cilin nuk kam pasur kurrë nevojë në jetën time”, ka deklaruar Rodri për “La Vanguardia”.
Fituesi i Topit të Artë pranon se rrjetet sociale kanë edhe anë pozitive, por beson se distancimi prej tyre i ka bërë më shumë mirë gjatë karrierës.
“E kuptoj që rrjetet sociale kanë shumë gjëra të mira, por edhe shumë të këqija. Thjesht mendoj se është një vendim shumë i pjekur, të cilin e mora që në moshë të re dhe që më ka ndihmuar shumë në karrierën time. Nëse më pyet pse, përgjigjja është e thjeshtë: nuk kam nevojë për to”, shtoi ai.
Rodri foli gjithashtu për rëndësinë e edukimit dhe studimeve në mënyrën se si ka përballuar presionin që shoqëron jetën e një futbollisti profesionist.
Mesfushori i Barcelonës ka përfunduar studimet për Administrim Biznesi dhe beson se universiteti i dha një perspektivë tjetër, duke e ndihmuar të largohej për një moment nga “flluska” e futbollit.
“Sa herë flas me të rinj që sapo kanë nisur rrugëtimin e tyre, gjithmonë u rekomandoj të studiojnë. Jo vetëm për njohuritë që fiton, edhe pse edhe ato janë të rëndësishme, por sepse për mua studimet ishin një mënyrë për t’i shpëtuar presionit të përditshmërisë së një futbollisti, e cila mund të jetë shumë e rënduar”, u shpreh Rodri.
Ai shpjegoi se jeta universitare i mundësoi të kalonte kohë me njerëz të moshës së tij dhe të diskutonte për tema që nuk kishin të bënin me futbollin.
“Të zhvilloja biseda me njerëz të moshës sime, jo për paratë dhe jo për gjëra të tjera që të gjithë e dimë se mund të ndodhin në futboll, më ndihmoi jashtëzakonisht shumë”.
Rodri beson se edukimi dhe mënyra e tij e të jetuarit dëshmojnë se një futbollist mund të arrijë majat edhe pa humbur lidhjen me jetën normale.
“Besoj se kam treguar se ekzistojnë edhe rrugë të tjera për të arritur majat, rrugë që janë më pasuruese në aspektin personal dhe në çdo drejtim tjetër. Dhe pikërisht këtë mundohem t’ua përcjell njerëzve”, përfundoi ai. /Telegrafi/
