Ambasadori i Arabisë Saudite në OKB e dënoi ashpër milicinë Houthi të Jemenit – e cila mbështetet nga Irani – për sulmet e përsëritura ndaj civilëve në Jemen dhe Arabinë Saudite, si dhe paralajmëroi se Riadi e rezervon të drejtën për t’u mbrojtur.
“Këto nuk janë incidente të izoluara, por përkundrazi një zgjerim i një qasjeje sistematike armiqësore të ndjekur nga kjo milici që nga grushti i shtetit kundër qeverisë legjitime të Jemenit në vitin 2014”, ka thënë përfaqësuesi i përhershëm i Arabisë Saudite në OKB, Abdulaziz al-Wasel.
“Është një qasje që bazohet në shënjestrimin e civilëve dhe objekteve ekonomike, si dhe në përdorimin e dhunës e të kërcënimeve për të imponuar vullnetin e saj me forcë”, shtoi ai.
Duke folur gjatë një mbledhjeje urgjente të Këshillit të Sigurimit të OKB-së për të diskutuar situatën në Jemen, al-Wasel theksoi se sulmet e fundit të Houthi-ve vijnë në kuadrin e një përshkallëzimi më të gjerë dhe të ndërlidhur të veprimeve të tyre, që nisi brenda Jemenit.
“Ato filluan me përshkallëzim ushtarak brenda Jemenit dhe më pas u zgjeruan duke shënjestruar Mbretërinë [e Arabisë Saudite], qytetarët dhe banorët e saj, si dhe burimet e saj”, tha ai.
Al-Wasel shprehu gjithashtu shqetësimin për sulmet e Houthi-ve ndaj anijeve tregtare dhe cisternave në Detin e Kuq dhe në ngushticën Bab el-Mandeb.
“Shënjestrimi i anijeve tregtare nga milicia terroriste Houthi, si dhe kërcënimet ndaj ekuipazheve të tyre dhe ndaj lirisë së lundrimit në Detin e Kuq dhe në ngushticën Bab el-Mandeb, përbëjnë sjellje kriminale jashtëzakonisht të rrezikshme”, ka shtuar al-Wasel. /Telegrafi/
